Memleket basshysy Qasym-Jomart Toqaev Energetıka mınıstri Almasadam Sátqalıevti qabyldady. Bul týraly búgin, 23 jeltoqsanda Aqordanyń baspasóz qyzmeti jazdy, dep habarlaıdy «Adyrna» tilshisi.
Prezıdentke vedomstvo jumysynyń negizgi qorytyndylary men elimizdegi otyn-energetıka keshenin damytý jospary, sondaı-aq munaı-gaz jáne energetıka salalaryndaǵy iri jobalardyń júzege asyrylýy jóninde aqparat berildi. Sondaı-aq jylytý maýsymynyń barysy jáne jylý-elektrmen qamtý boıynsha iri nysandardyń jumysy týraly baıandaldy.
«Memleket basshysy jylytý maýsymyn erekshe baqylaýda ustaýdy jáne energetıka ınfraqurylymyn jańǵyrtýǵa qatysty jobalardy iske asyrýdy tapsyrdy. Odan bólek, Qazaqstandaǵy atom elektr stanııasynyń qurylysyn jedeldetýdiń mańyzyn atap ótti»,—delingen habarlamada.
