Aýyl sharýashylyǵy mınıstri Aıdarbek Saparov «Shańyraq» qoǵamdyq birlestiginiń jetekshisi Almasbek Sadyrbaıdyń qamaýǵa alynǵanyna baılanysty málimdeme jasady, dep habarlaıdy «Adyrna» tilshisi.
«Almasbek Sadyrbaıdyń ustalýyna bizdiń qatysymyz joq. Ol aýyl sharýashylyǵy qyzmetkeri emes. Quqyq qorǵaý organdary ony ustasa, nege ustaǵanyn ózderi de biletin shyǵar. Buryn da aıtqamyn. Qazir de qaıtalaıyn. Sýbsıdııa – shyǵynnyń ornyn toltyrý úshin beriletin qarajat. 2023 jyldan bastap sýbsıdııany oblystar beredi. Aýyl sharýashylyǵy mınıstrligi tek erejeni qabyldaıdy.
Sýbsıdııa alatyn adam ótinish bergende jaýapkershiliktiń bárin moınyna alatyndaı astyna qolyn qoıady. Sondyqtan ne úshin ustalǵanyn, qalaı ekeni jóninde pikir bildire almaımyn»,– dedi ol Májilis kýlýarynda.
Aıta keteıik, 6 qarashada Qarjy monıtorıng agenttigi Almas Sadyrbaıdy kooperatıvke birikken sharýa qojalyqtarynyń atynan sýbsıdııa alǵan degen kúdikpen ustady. Ustalmas buryn ol áleýmettik jeli arqyly ózine qarsy zańsyz áreketter júrip jatqanyn aıtqan edi.
«Qurmetti prezıdent Qasym-Jomart Kemeluly Toqaev, UKQ tóraǵasy Ermek Aldabergenuly Saǵymbaev, Antıkor basshysy Ashat Jumaǵalı, sizderdiń osy iske aralasýlaryńyzdy suraımyn. Óıtkeni Almaty oblysynda ádiletsizdik bolyp jatyr. Maǵan jala jaýyp, áriptes, seriktesterimdi qamap, zańsyz áreketter júrýde»,—dedi Almas Sadyrbaı.
