اۋىل شارۋاشىلىعى ءمينيسترى ايداربەك ساپاروۆ «شاڭىراق» قوعامدىق بىرلەستىگىنىڭ جەتەكشىسى الماسبەك سادىربايدىڭ قاماۋعا الىنعانىنا بايلانىستى مالىمدەمە جاسادى، دەپ حابارلايدى «ادىرنا» ءتىلشىسى.
«الماسبەك سادىربايدىڭ ۇستالۋىنا ءبىزدىڭ قاتىسىمىز جوق. ول اۋىل شارۋاشىلىعى قىزمەتكەرى ەمەس. قۇقىق قورعاۋ ورگاندارى ونى ۇستاسا، نەگە ۇستاعانىن وزدەرى دە بىلەتىن شىعار. بۇرىن دا ايتقامىن. قازىر دە قايتالايىن. سۋبسيديا – شىعىننىڭ ورنىن تولتىرۋ ءۇشىن بەرىلەتىن قاراجات. 2023 جىلدان باستاپ سۋبسيديانى وبلىستار بەرەدى. اۋىل شارۋاشىلىعى مينيسترلىگى تەك ەرەجەنى قابىلدايدى.
سۋبسيديا الاتىن ادام ءوتىنىش بەرگەندە جاۋاپكەرشىلىكتىڭ ءبارىن موينىنا الاتىنداي استىنا قولىن قويادى. سوندىقتان نە ءۇشىن ۇستالعانىن، قالاي ەكەنى جونىندە پىكىر بىلدىرە المايمىن»،– دەدى ول ءماجىلىس كۋلۋارىندا.
ايتا كەتەيىك، 6 قاراشادا قارجى مونيتورينگ اگەنتتىگى الماس سادىربايدى كووپەراتيۆكە بىرىككەن شارۋا قوجالىقتارىنىڭ اتىنان سۋبسيديا العان دەگەن كۇدىكپەن ۇستادى. ۇستالماس بۇرىن ول الەۋمەتتىك جەلى ارقىلى وزىنە قارسى زاڭسىز ارەكەتتەر ءجۇرىپ جاتقانىن ايتقان ەدى.
«قۇرمەتتى پرەزيدەنت قاسىم-جومارت كەمەلۇلى توقاەۆ، ۇكق توراعاسى ەرمەك الدابەرگەنۇلى ساعىمباەۆ، انتيكور باسشىسى اسحات جۇماعالي، سىزدەردىڭ وسى ىسكە ارالاسۋلارىڭىزدى سۇرايمىن. ويتكەنى الماتى وبلىسىندا ادىلەتسىزدىك بولىپ جاتىر. ماعان جالا جاۋىپ، ارىپتەس، سەرىكتەستەرىمدى قاماپ، زاڭسىز ارەكەتتەر جۇرۋدە»،—دەدى الماس سادىرباي.
