Qansha ýaqyt boıy kútip júrgen ShYU sammıti ótti. Qazaqstan uıymǵa bir jyl tóraǵalyq etip, endi mine búgin sonyń qorytyndysyn shyǵardy. Sammıtke álemniń jer-jerinen memleket basshylary men halyqaralyq uıym ókilderi kelgen eken. Onyń ústine búgin Belarýs uıymǵa múshe atandy. Bastapqyda Shanhaı bestigi retinde qurylǵan uıymǵa Belarýs qosylyp, ondyqqa aınaldy.
Jalpy, búgingi ótip jatqan is-sharanyń mańyzy zor. Atalmysh uıym bir kezderi Eýrazııa aımaǵyndaǵy yntymaqtastyqty nyǵaıtý úshin qurylǵan bolatyn. Al qazir álem terrorızm, ekstremızm, kıberqaýipter pen klımattyń ózgerýi sııaqty túrli qaýipterdiń aldynda turǵan kezde, ShYU róli kún sanap artyp keledi.
Sonymen búgingi kún Q. Toqaevtyń qatysýmen ótken ShYU-ǵa múshe memleketter basshylary keńesiniń otyrysynan bastaldy. Otyrysta sóz sóılegen basshymyz búginde Shanhaı yntymaqtastyq uıymy dostyq, tatý kórshilik, teńquqyqtyq pen ózara qoldaýdyń, ıaǵnı «shanhaı rýhy» negizinde jumys isteıtin memleketaralyq qatynastardyń tıimdi tetigine aınalǵanyn atap ótti.
Byltyrdan bastap uıymǵa tóraǵalyq etken ýaqyt aralyǵynda túrli deńgeıde 150-ge jýyq is-shara, sonyń ishinde ıfrlyq damý, týrızm, energetıka, bıznes salalarynda forýmdar men ShYU jastar keńesi ótkizildi. Bul jaıly da Q. Toqaev málimdedi. Ary qaraı óz sózinde túrli is-sharalardyń nátıjesinde ShYU keńistigindegi saýda-ekonomıkalyq yntymaqtastyq qarqyndy damyp kele jatqanyna toqtaldy.
Jalpy, Toqaev Qazaqstan ShYU tóraǵasy retinde aldyńǵy sammıtte aıtylǵan barlyq maqsat-mindetti tolyǵymen oryndaǵanyn aıtty. Sondaı-aq Prezıdent elimizdiń bastamalaryn júzege asyrýǵa qoldaý kórsetip, belsendi atsalysqany úshin barlyq memleketke shynaıy rızashylyǵyn bildirdi.
Árıne, Prezıdent qaýipsizdik salasyndaǵy ózara senim men yntymaqtastyqty nyǵaıtýdy birinshi mańyzdy baǵyt ekenin de nazardan tys qaldyrǵan joq.
«Qazirgi kúrdeli ahýal – negizinen halyqaralyq qatynastar júıesindegi daǵdarys saldary. Osy rette halyqaralyq quqyqtyń kemshin tustaryn túzep, geosaıası turǵydan jikke bólinýge jol bermeý maqsatymen, túptep kelgende, jahandyq aýqymdaǵy beıbitshilik pen qaýipsizdikti nyǵaıtý úshin ShYU óziniń turaqtandyrýshy jáne jasampazdyq rólin kúsheıtýge tıis» dep ShYU-nyń álem elderindegi turaqtylyqqa yqpal ete alatynyna basymdyq bergen eken.
Otyrysta qatysýshy elder úshin ǵana emes, jalpy, álem elderi úshin mańyzdy taqyryptar qozǵalǵan eken. Osyndaı aımaqtyq is-sharalardyń ótýi mańyzdy, sebebi bul tek basshylardyń kezdesýi ǵana emes, pikir almasyp, mańyzdy sheshimder qabyldanatyn alań.
