Qazirgi tańda bıýdjet qarjysyna 10-shaǵyn aýdanda 180 páterli 3 turǵyn úıdiń qurylysy júrýde. Sondaı-aq árqaısysy 60 páterlik 9 kópqabatty úıdiń smetalyq qujattary jasalyp jatyr. Bul týraly Qonaev qalasynyń ákimdigi uıymdastyrǵan press-týr barysynda belgili boldy.
«Aldaǵy jyldary 31 kópqabatty úı turǵyzý josparlanǵan. Jalpy 2050 jylǵa eseptelgen Bas josparǵa sáıkes, 2 538.2 myń sharshy metr turǵyn úıdi qoldanysqa berý kózdelýde», – dedi qurylys bóliminiń bas mamany Samal Tasqalıeva.
Tilshiler búginde jeke ınvestorlardyń qarjysyna salynyp jatqan «Sun City» jáne «Arıstokrat»keshenderine bardy. «Sun City» kesheni 12 qabattan, 3 bólikten turady. Jalpy aýdany – 23 000 sharshy metr, munda 360 páter bar.
Al «Arıstokrat» kesheninde 552 páter qamtylǵan. Ǵımarattyń jalpy aýdany – 54,5 myń sh.m. Bes blokty 10,9 myń sh.m. quraıtyn bóligin bıyl paıdalanýǵa berý josparlanǵan.
«Qalamyzda 7 qurylys kompanııasy óz qarajattary esebinen 2 turǵyn úı kesheni men 5 kópqabatty turǵyn úı qurylysyn júrgizýde. Olardyń jalpy aýdany 123,61 myń sharshy metrdi quraıdy. Halyqtyń áleýmettik osal toptaryn kommýnaldyq turǵyn úımen qamtamasyz etý maqsatynda 85 páter satyp alynyp, turǵyn úı-kommýnaldyq sharýashylyǵy bóliminiń teńgerimine ótti. Jaqynda tabys etiledi», – dedi maman.
Budan keıin jýrnalıster buqaralyq sportty damytýǵa arnalǵan «Krossfıt» alańyna bardy. Munda shaǵyn fýtbol, basketbol, vorkaýt alańdary ornalasqan. Tapsyrys berýshi – qalalyq ákimdiktiń turǵyn úı-kommýnaldyq sharýashylyǵy bólimi. Qurylys jumystary byltyr bastalyp, bıyl aıaqtalady dep kútilýde. Nysannyń jalpy aýmaǵy – 1 gektardan astam. Alańnyń árin jasyl aımaq pen shaǵyn sáýlettik nysandar keltirip tur.
«Bul jerde jurt demalýǵa ári deneshynyqtyrýmen aınalysýǵa arnalǵan sporttyq sharalardy uıymdastyrmaqpyz. Qonaevta jylyna 300-den astam túrli týrnır, jarystar, dodalar ótedi. Sportsúıer qaýymnyń da sany jyl sanap artýda. Ásirese, ashyq alańda uıymdastyrylatyn sharalardyń kórermeni qalyń», – dedi mádenıet jáne sport bóliminiń basshysy Bıbigúl Shaıkenova.
Budan bólek, BAQ qyzmetkerleri jańadan ashylǵan №5 qalalyq jaǵajaıdy aralap shyqty. Demalys ornynyń aýmaǵy 2,7 gektardy alyp jatyr. Munda fýtbol, voleıbol, vorkaýt, balalar oıyn alańdary, ústel tennısi ornatylǵan. Sýǵa túsý orny men dárethana, shatyrlar, pırs, jasyl aımaq, bıznes obektileri, balalar basseıni, avtoturaq ta bar. Qutqarýshylarǵa arnalǵan 2 oryn qoıylǵan.
Jergilikti mamandardyń sózinshe, qalada týrızm salasyn damytýǵa erekshe kóńil bólinip otyr. Byltyrǵy shomylý maýsymynda 1,2 mln halyq kelse, bıyl onyń sany eki ese ósýi múmkin degen boljam bar. Osy baǵyttaǵy jumystar ary qaraı da jalǵasyn tabady.
Jaǵajaı jaıly jurtshylyq ta pikirin bildirdi.
«Unady. Bul nysan basqalarmen salystyrǵanda ádemi etip jasalǵan eken. Balalarymyz haýyzǵa shomylyp, átkenshek teýip, rıza bolyp júr. Qonaev órkendep, damı bersin», – dedi almatylyq turǵyn Aıgerim.
Sonymen qatar mamandar Qonaevta №6 jáne №7 jaǵajaılardy abattandyrý kózdelip otyrǵanyn aıtty. Al №8 jaǵajaı ınvestorlar qarjysyna salynyp, attrakıondar parkine aınalmaq.
