قازىرگى تاڭدا بيۋدجەت قارجىسىنا 10-شاعىن اۋداندا 180 پاتەرلى 3 تۇرعىن ءۇيدىڭ قۇرىلىسى جۇرۋدە. سونداي-اق ارقايسىسى 60 پاتەرلىك 9 كوپقاباتتى ءۇيدىڭ سمەتالىق قۇجاتتارى جاسالىپ جاتىر. بۇل تۋرالى قوناەۆ قالاسىنىڭ اكىمدىگى ۇيىمداستىرعان پرەسس-تۋر بارىسىندا بەلگىلى بولدى.
«الداعى جىلدارى 31 كوپقاباتتى ءۇي تۇرعىزۋ جوسپارلانعان. جالپى 2050 جىلعا ەسەپتەلگەن باس جوسپارعا سايكەس، 2 538.2 مىڭ شارشى مەتر تۇرعىن ءۇيدى قولدانىسقا بەرۋ كوزدەلۋدە»، – دەدى قۇرىلىس ءبولىمىنىڭ باس مامانى سامال تاسقاليەۆا.
تىلشىلەر بۇگىندە جەكە ينۆەستورلاردىڭ قارجىسىنا سالىنىپ جاتقان «Sun City» جانە «اريستوكرات»كەشەندەرىنە باردى. «Sun City» كەشەنى 12 قاباتتان، 3 بولىكتەن تۇرادى. جالپى اۋدانى – 23 000 شارشى مەتر، مۇندا 360 پاتەر بار.
ال «اريستوكرات» كەشەنىندە 552 پاتەر قامتىلعان. عيماراتتىڭ جالپى اۋدانى – 54,5 مىڭ ش.م. بەس بلوكتى 10,9 مىڭ ش.م. قۇرايتىن بولىگىن بيىل پايدالانۋعا بەرۋ جوسپارلانعان.
«قالامىزدا 7 قۇرىلىس كومپانياسى ءوز قاراجاتتارى ەسەبىنەن 2 تۇرعىن ءۇي كەشەنى مەن 5 كوپقاباتتى تۇرعىن ءۇي قۇرىلىسىن جۇرگىزۋدە. ولاردىڭ جالپى اۋدانى 123,61 مىڭ شارشى مەتردى قۇرايدى. حالىقتىڭ الەۋمەتتىك وسال توپتارىن كوممۋنالدىق تۇرعىن ۇيمەن قامتاماسىز ەتۋ ماقساتىندا 85 پاتەر ساتىپ الىنىپ، تۇرعىن ءۇي-كوممۋنالدىق شارۋاشىلىعى ءبولىمىنىڭ تەڭگەرىمىنە ءوتتى. جاقىندا تابىس ەتىلەدى»، – دەدى مامان.
بۇدان كەيىن جۋرناليستەر بۇقارالىق سپورتتى دامىتۋعا ارنالعان «كروسسفيت» الاڭىنا باردى. مۇندا شاعىن فۋتبول، باسكەتبول، ۆوركاۋت الاڭدارى ورنالاسقان. تاپسىرىس بەرۋشى – قالالىق اكىمدىكتىڭ تۇرعىن ءۇي-كوممۋنالدىق شارۋاشىلىعى ءبولىمى. قۇرىلىس جۇمىستارى بىلتىر باستالىپ، بيىل اياقتالادى دەپ كۇتىلۋدە. نىساننىڭ جالپى اۋماعى – 1 گەكتاردان استام. الاڭنىڭ ءارىن جاسىل ايماق پەن شاعىن ساۋلەتتىك نىساندار كەلتىرىپ تۇر.
«بۇل جەردە جۇرت دەمالۋعا ءارى دەنەشىنىقتىرۋمەن اينالىسۋعا ارنالعان سپورتتىق شارالاردى ۇيىمداستىرماقپىز. قوناەۆتا جىلىنا 300-دەن استام ءتۇرلى تۋرنير، جارىستار، دودالار وتەدى. سپورتسۇيەر قاۋىمنىڭ دا سانى جىل ساناپ ارتۋدا. اسىرەسە، اشىق الاڭدا ۇيىمداستىرىلاتىن شارالاردىڭ كورەرمەنى قالىڭ»، – دەدى مادەنيەت جانە سپورت ءبولىمىنىڭ باسشىسى بيبىگۇل شايكەنوۆا.
بۇدان بولەك، باق قىزمەتكەرلەرى جاڭادان اشىلعان №5 قالالىق جاعاجايدى ارالاپ شىقتى. دەمالىس ورنىنىڭ اۋماعى 2,7 گەكتاردى الىپ جاتىر. مۇندا فۋتبول، ۆولەيبول، ۆوركاۋت، بالالار ويىن الاڭدارى، ۇستەل تەننيسى ورناتىلعان. سۋعا ءتۇسۋ ورنى مەن دارەتحانا، شاتىرلار، پيرس، جاسىل ايماق، بيزنەس وبەكتىلەرى، بالالار باسسەينى، اۆتوتۇراق تا بار. قۇتقارۋشىلارعا ارنالعان 2 ورىن قويىلعان.
جەرگىلىكتى مامانداردىڭ سوزىنشە، قالادا تۋريزم سالاسىن دامىتۋعا ەرەكشە كوڭىل ءبولىنىپ وتىر. بىلتىرعى شومىلۋ ماۋسىمىندا 1,2 ملن حالىق كەلسە، بيىل ونىڭ سانى ەكى ەسە ءوسۋى مۇمكىن دەگەن بولجام بار. وسى باعىتتاعى جۇمىستار ارى قاراي دا جالعاسىن تابادى.
جاعاجاي جايلى جۇرتشىلىق تا پىكىرىن ءبىلدىردى.
«ۇنادى. بۇل نىسان باسقالارمەن سالىستىرعاندا ادەمى ەتىپ جاسالعان ەكەن. بالالارىمىز حاۋىزعا شومىلىپ، اتكەنشەك تەۋىپ، ريزا بولىپ ءجۇر. قوناەۆ وركەندەپ، دامي بەرسىن»، – دەدى الماتىلىق تۇرعىن ايگەرىم.
سونىمەن قاتار ماماندار قوناەۆتا №6 جانە №7 جاعاجايلاردى اباتتاندىرۋ كوزدەلىپ وتىرعانىن ايتتى. ال №8 جاعاجاي ينۆەستورلار قارجىسىنا سالىنىپ، اتتراكتسيوندار پاركىنە اينالماق.
