El prezıdenti Qasym-Jomart Toqaevtyń bastamasymen júrip jatqan «Taza Qazaqstan» akııasyna Qostanaı oblysynyń ár aýdany belsene at salysýda. Búginde qorshaǵan ortaǵa qamqorlyq tanytýǵa baǵyttalǵan is-sharalar óńirde «Ónegeli urpaq» aptalyǵymen jalǵasyp jatyr.
Ekoakııa aıasynda Qostanaı joǵary pedagogıkalyq kolledjiniń stýdentteri men oqytýshylar ujymy týǵan ólkeni kórkeıtýge degen umtylystaryn eńbekqorlyqpen kórsetti. Olar búgingi senbilikti kolledj aýmaǵyn qystaı jınalǵan kúl-qoqystan tazalap, turmystyq qaldyqtardan aryltyp, abbatandyrýǵa arnady.
– Atalmysh akııany kóktem aılarynda ǵana emes, jyl boıy júrgizetin bolamyz. Qazir oblys ákimdiginde osy baǵytta jeke is-sharalar jospary qabyldandy. Oǵan sáıkes túrli áleýmettik, mádenı mekemelerdiń kútip ustaýyna qaladaǵy eskertkishter men oryndar beriletin bolady. Jyl boıy sol usynylǵan jerdi abbatandyryp, gúl otyrǵyzyp, kórkeıtýmen aınalysady. Bul tájirıbeni oblys aýdandarynda da qoldanýdy josparlap otyrmyz, – deıdi Qostanaı oblysy ákiminiń orynbasary Rınat Muhametqalı.
Stýdentter 80-nen astam aǵash túpterin qopsytyp, qýraǵan butalardy qyrqyp, ákteý-syrlaý jumystaryn júrgizdi. Ekologııalyq is-shara ári qaraı jasyl jelek egýmen jalǵasty. Ekoakııaǵa barlyǵy 125 adam at salysyp, 35 aǵash kósheti men lalagúlderdiń 50 tamyryn otyrǵyzdy.
– Tabıǵatty qorǵaı otyra, biz, birinshi kezekte, óz ómirimizdi qorǵaı alamyz. Bolashaq pedagogter retinde, óz isimiz arqyly óskeleń urpaqqa úlgi bolǵymyz keledi. Biz úshin tabıǵat pen qorshaǵan ortaǵa qamqorlyq tanytý azamattyq mindetterimizdiń biri sanalady, – deıdi Qostanaı joǵary pedagogıkalyq kolledjiniń 1-kýrs stýdenti Vıktorııa Shýlıka.
Kolledj stýdentteri sáýir aıyndaǵy tabıǵı apattan zardap tartqan halyqqa qol kómegin kórsetip, tasqyn sýdan japa shekken dalany qalpyna keltirý jumystaryna da belsendi qatysqan bolatyn. Ekobelsendiler 16 mamyrda «Jas aǵash» biryńǵaı respýblıkalyq akııasynan da qalys qalmaýdy josparlap otyr. Pedkolledj tárbıelenýshileri úshin bul tek tabıǵatqa qamqorlyq tanytý emes, sondaı-aq óz ólkesine degen súıispenshiliktiń kórinisine aınalmaq.
