ەل پرەزيدەنتى قاسىم-جومارت توقاەۆتىڭ باستاماسىمەن ءجۇرىپ جاتقان «تازا قازاقستان» اكتسياسىنا قوستاناي وبلىسىنىڭ ءار اۋدانى بەلسەنە ات سالىسۋدا. بۇگىندە قورشاعان ورتاعا قامقورلىق تانىتۋعا باعىتتالعان ءىس-شارالار وڭىردە «ونەگەلى ۇرپاق» اپتالىعىمەن جالعاسىپ جاتىر.
ەكواكتسيا اياسىندا قوستاناي جوعارى پەداگوگيكالىق كوللەدجىنىڭ ستۋدەنتتەرى مەن وقىتۋشىلار ۇجىمى تۋعان ولكەنى كوركەيتۋگە دەگەن ۇمتىلىستارىن ەڭبەكقورلىقپەن كورسەتتى. ولار بۇگىنگى سەنبىلىكتى كوللەدج اۋماعىن قىستاي جينالعان كۇل-قوقىستان تازالاپ، تۇرمىستىق قالدىقتاردان ارىلتىپ، ابباتاندىرۋعا ارنادى.
– اتالمىش اكتسيانى كوكتەم ايلارىندا عانا ەمەس، جىل بويى جۇرگىزەتىن بولامىز. قازىر وبلىس اكىمدىگىندە وسى باعىتتا جەكە ءىس-شارالار جوسپارى قابىلداندى. وعان سايكەس ءتۇرلى الەۋمەتتىك، مادەني مەكەمەلەردىڭ كۇتىپ ۇستاۋىنا قالاداعى ەسكەرتكىشتەر مەن ورىندار بەرىلەتىن بولادى. جىل بويى سول ۇسىنىلعان جەردى ابباتاندىرىپ، گۇل وتىرعىزىپ، كوركەيتۋمەن اينالىسادى. بۇل تاجىريبەنى وبلىس اۋداندارىندا دا قولدانۋدى جوسپارلاپ وتىرمىز، – دەيدى قوستاناي وبلىسى اكىمىنىڭ ورىنباسارى رينات مۇحامەتقالي.
ستۋدەنتتەر 80-نەن استام اعاش تۇپتەرىن قوپسىتىپ، قۋراعان بۇتالاردى قىرقىپ، اكتەۋ-سىرلاۋ جۇمىستارىن جۇرگىزدى. ەكولوگيالىق ءىس-شارا ءارى قاراي جاسىل جەلەك ەگۋمەن جالعاستى. ەكواكتسياعا بارلىعى 125 ادام ات سالىسىپ، 35 اعاش كوشەتى مەن لالاگۇلدەردىڭ 50 تامىرىن وتىرعىزدى.
– تابيعاتتى قورعاي وتىرا، ءبىز، ءبىرىنشى كەزەكتە، ءوز ءومىرىمىزدى قورعاي الامىز. بولاشاق پەداگوگتەر رەتىندە، ءوز ءىسىمىز ارقىلى وسكەلەڭ ۇرپاققا ۇلگى بولعىمىز كەلەدى. ءبىز ءۇشىن تابيعات پەن قورشاعان ورتاعا قامقورلىق تانىتۋ ازاماتتىق مىندەتتەرىمىزدىڭ ءبىرى سانالادى، – دەيدى قوستاناي جوعارى پەداگوگيكالىق كوللەدجىنىڭ 1-كۋرس ستۋدەنتى ۆيكتوريا شۋليكا.
كوللەدج ستۋدەنتتەرى ءساۋىر ايىنداعى تابيعي اپاتتان زارداپ تارتقان حالىققا قول كومەگىن كورسەتىپ، تاسقىن سۋدان جاپا شەككەن دالانى قالپىنا كەلتىرۋ جۇمىستارىنا دا بەلسەندى قاتىسقان بولاتىن. ەكوبەلسەندىلەر 16 مامىردا «جاس اعاش» بىرىڭعاي رەسپۋبليكالىق اكتسياسىنان دا قالىس قالماۋدى جوسپارلاپ وتىر. پەدكوللەدج تاربيەلەنۋشىلەرى ءۇشىن بۇل تەك تابيعاتقا قامقورلىق تانىتۋ ەمەس، سونداي-اق ءوز ولكەسىنە دەگەن سۇيىسپەنشىلىكتىڭ كورىنىسىنە اينالماق.
