Алматы қаласында Ұлттық ұлан жауынгерлері блокпосттарды айналып өтпек болған 4 адамды қолға түсірді, деп хабарлайды Tengrinews.kz тілшісі Ұлттық ұланның баспасөз қызметіне сілтеме жасап.
Коронавирустың алдын алу мақсатында карантин жарияланған Алматы қаласының шеткі аймақтарын күзету шаралары күшейтілді.
Баспасөз қызметінің хабарлауынша, аға сержант Қанат Бейсенбаев басшылық жасайтын әскери топ өзенді кесіп өтіп, қала аумағына жақындап келе жатқан екі адамды байқаған.
"Әскери топ бұл адамды тоқтатқан. Мән-жайды анықтау барысында олардың жұмыс іздеп, қала аумағына өтпекші болғандары анықталды", - делінген хабарламада.
Сондай-ақ, Ақсай өзенінен өтпек болған тағы екі адам ұсталды. Мән-жайды анықтау үшін барлық адам аудандық ішкі істер басқармасына жеткізілді.
