Ауыл шаруашылығы министрі Айдарбек Сапаров Қазақстандағы сиыр етінің қымбаттауына қатысты түсініктеме берді, деп хабарлайды “Адырна” ұлттық порталы.
Үкімет отырысында министрден ет бағасының қымбаттауына қатысты сауал жолданды. Қымбатшылық бірнеше жыл бұрынғы құрғақшылықпен байланысты ма, жоқ па?
“Біріншіден, барлық мал қырылған жоқ. Екіншіден, еттің қымбаттауы құрғақшылыққа байланысты емес. Өткен жылы біз қалыпты өнім алдық, жем-шөп қоры жеткілікті және арзан. Бірақ бағаны делдалдар көтеріп отыр. Тәжікстан тарапынан сұраныс артқандықтан, ет бағасы өсті. Дегенмен қазіргі уақытта баға біртіндеп тұрақталып келеді. Еттің бір келісі 2,7 мың – 3,3 мың теңге аралығында сатылуда, кей жерлерде 3,5 мың теңгеге жеткен. Бірақ елде ет тапшылығы жоқ”, – деді министр.
Сонымен қатар, одан көктемге дейін баға қалай өзгеретіні сұралды.
“Алдын ала болжам айту қиын. Себебі баға нарықтағы сұраныс пен ұсынысқа байланысты. Біздің міндетіміз – өндірісті қамтамасыз ету”, – деп жауап берді Сапаров.
