2024 жылдың 23 қазанында БҰҰ Бас хатшысы Антониу Гутерриш Ресейдің Қазан қаласына XVI БРИКС саммитіне қатысу үшін келді. Бас хатшыны қала мэрі Ильсур Метшин қарсы алды. Бұл саммитке 36 елдің және алты халықаралық ұйымның өкілдері қатысуда, деп хабарлайды «Адырна» ұлттық порталы.
Саммит аясында бірнеше жоғары деңгейлі кездесулер өтуде. Атап айтқанда, Ресей президенті Владимир Путин мен Қытай төрағасы Си Цзиньпиннің Қазан Кремлінде өткен кездесуі халықаралық тұрғыда назар аудартты.
Саммит барысында сауда, экономика, технология, сондай-ақ жаңа жаһандық экономикалық жүйені құру мәселелері талқыланды. Татарстан өз кезегінде қонақтарды ұлттық дәстүрлермен таныстырып, жоғары деңгейдегі ұлттық тағамдар ұсынып, мәдени бағдарламалар ұйымдастырды.
БҰҰ Бас хатшысының саммитке қатысуы әлемдік саясатта үлкен резонанс тудырды. АҚШ Мемлекеттік департаменті бұл қадамды ерекше атап өтіп, БҰҰ-ның Ресейдің Украинаға басып кіруіне қарсы ұстанымын еске салды. АҚШ Мемлекеттік департаментінің өкілі Ведант Пател атап өткендей, Америка Құрама Штаттары БРИКС-тің кейбір елдерімен, соның ішінде Бразилия, Үндістан және Оңтүстік Африкамен екіжақты негізде жақсы қарым-қатынастар орнатқан. Сонымен қатар, Қытаймен бәсекелестікті басқару маңызды мақсат ретінде қарастырылуда, ал Ресейге қатысты Вашингтон агрессияға қарсы ұстанымын сақтайтынын мәлімдеді.
Айта кету керек, БҰҰ Бас хатшысы бұдан алдын Швейцария ұйымдастырған Украина мәселесі бойынша "Бейбітшілік саммитіне" қатыспаған еді.
БРИКС саммиті 24 қазанға дейін жалғасады және оның нәтижелері жаһандық экономикалық және саяси сахнадағы негізгі бағыттарға ықпал етуі мүмкін.
