Қазақстан мен Үндістан терроризмге қарсы бірлескен оқу-жаттығуын бастады. Бұл туралы ҚР Қорғаныс министрлігінің баспасөз қызметі мәлімдеді, деп хабарлайды “Адырна” ұлттық порталы.
«Жаттығу барысында екі контингенттің әскери қызметшілері лаңкестікке қарсы қауіпсіздікті қамтамасыз ету бойынша таулы дайындық пен тәжірибелік дайындық аясында бірлескен жұмыстан өтеді. Қону сатысында Қазақстанның Әуе шабуылы күштерінің әскери қызметшілері үндістандық әріптестерімен бірге таулы аймақтарда парашютпен секіреді», - делінген хабарламада.
Жыл сайынғы бірлескен оқу-жаттығуға қатысу үшін Үндістанға Қазақстанның Құрлық әскерлері мен Әуе шабуылы күштерінің «Оңтүстік» өңірлік қолбасшылығы әскери қызметшілерінің біріккен ротасы барды.
Сондай-ақ, «KazInd-2024» бірлескен тактикалық оқу-жаттығуы Қазақстан мен Үндістан қорғаныс министрліктері арасындағы екіжақты ынтымақтастық жоспарын жүзеге асыру аясында өтіп жатқаны хабарланды.
