Ұлттық бірыңғай тестілеу балы жоғары болса да, грант ала алмай қалған мектеп түлектері Ғылым және жоғары білім министрлігін сотқа бермек. Бұл туралы әлеуметтік желіде адвокат Халида Әжіғұлова жазды, деп хабарлайды “Адырна” ұлттық порталы.
«Сот жүйесі істі қараудан бас тартса, Біріккен Ұлттар Ұйымының бала құқықтары жөніндегі комитетіне жүгінеміз», — деп жазды ол.
Сондай-ақ, балалар құқығын қорғаушы Медина Майсар әлеуметтік желіде гранттардың әділетсіз бөлінгендігі туралы жазды. Министрлік су тасқынынан зардап шеккен аймақтардан келген талапкерлерге 5000 грантты жеке емес, жалпы гранттан бөліп берген.
Майсардың жазуынша, министрлік төтенше жағдайдан зардап шеккендерге жалпы гранттан емес, бөлек грант бөлуі керек еді. Жалпы гранттан бөлудің әсерінен жоғары балл жинаған түлектер грант ала алмай қалған.
«2024 жылғы гранттарды бөлу кезінде әділдік болды дегенге күмәнім бар. Сондықтан ТЖ квотасына бөлінген 5112 гранттың орнын толтыру және грант ала алмаған талапкерлер арасында қайта бөлуді ұсынамын», – деп жазды ол.
Естеріңізге сала кетейік, білім және жоғары ғылым министрлігі су тасқынынан зардап шеккен аймақтардан келген талапкерлерге 5000 грантты жеке емес, жалпы гранттан бөліп берген.
