Өзіне қажет жағдайда қазақ тілінің «жанашыры болып», көлгір ұлтшылдықты саяси технология ретінде пайдаланып жүрген депутат, әкім, министрлер жетіп артылады. Тоғжанов соның бірі ғана. Ол жаңа ешнәрсе ойлап тапқан жоқ. Журналистің сұрағынан қашу үшін сіңірі шыққан тәсілді пайдаланды. Жалпы, ұлтшылдық тіл, дін, дәстүрдің төңірегінен көтеріліп, сөз бостандығы, адам құқығы, демократиялық құндылықтарды даулайтын, сол үшін күресетін деңгейге жетпейінше осы жүргеніміз жүрген. Көлгір ұлтшылдыққа қашан да қолдаушы табылады.
Ал орыс тілділер саяси журналистика, резонансты оқиғаларға араласқысы келсе қазақ тілін үйренулері қажет. Қазақ тілінсіз онымен айналысу мүмкін емес. Оған Қанды Қаңтар оқиғасы дәлел. Бір жарым жылдан бері өтіп жатқан сот процестерінің 90 пайызы қазақ тілінде жүруде. Сол жерден ақпарат таратып жүргендердің басым көпшілігі қазақ журналистері. Қазір қатты білінбес. Бірақ алдағы 5-10 жылда бүкіл салада күн тәртібін қазақ тілді қоғам қалыптастырады. Қаңтар оқиғасы соның бір бөлігі ғана…
