2025 جىلعى 11 قاڭتاردا جاڭا زەلانديانىڭ ۆەللينگتون قالاسىندا وتكەن حالىقارالىق ءداستۇرلى مۋزىكا جانە بي كەڭەسىنىڭ (ICTMD) 47-ءشى الەمدىك كونفەرەنتسياسىنىڭ باس اسسامبلەيا وتىرىسىندا ۇيىمنىڭ باسشىلىعى مەن اتقارۋشى كەڭەسىنىڭ قۇرامى سايلاندى.
كونفەرەنتسياعا 70 ەلدەن كەلگەن قاتىسۋشىلاردىڭ ەرەكشە نازارىن ۇيىمنىڭ اتقارۋشى كەڭەسىنىڭ باسشىلىق قۇرىلىمىنا «ICTMD ەلشىسى» دەگەن جاڭا مارتەبەنى ەنگىزۋ تۋرالى تاريحي شەشىمى اۋدارتتى.
بۇل قۇرمەتتى مارتەبە كەڭەستىڭ ماقساتتارىن ىلگەرىلەتۋگە ەلەۋلى ۇلەس قوسقان، مادەني مۇرانى ساقتاۋ جانە ناسيحاتتاۋ جولىندا ەڭبەك ەتىپ، ICTMD-ءتىڭ حالىقارالىق ارەنادا دامۋىنا بولاشاعى زور جوسپارلار ۇسىنعان بەلگىلى مادەنيەت جانە ونەر قايراتكەرلەرىنە بەرىلەدى.
ICTMD پرەزيدەنتى سۆەنيبور پەتتان (سلوۆەنيا) كانديداتتاردى تانىستىرا وتىرىپ: «دۇيسەن قاسەيىنوۆتىڭ باسشىلىعىمەن تۇركسوي ICTMD-ءتىڭ ستراتەگيالىق سەرىكتەسىنە اينالىپ، بىرقاتار ماڭىزدى شارالاردى وتكىزۋگە قولداۋ كورسەتتى.
"تۇركى حالىقتارىنىڭ مادەني مۇراسىن ساقتاۋ جانە ونى الەمدىك مادەني كەڭىستىكتە ناسيحاتتاۋ بويىنشا حالىقارالىق مادەني ىنتىماقتاستىقتى دامىتۋعا باعىتتالعان دۇيسەن قاسەيىنوۆتىڭ كوپجىلدىق جان-جاقتى قىزمەتى ICTMD ماقساتتارى مەن ميسسيالارىن ىلگەرىلەتۋگە ەلەۋلى ۇلەس قوستى", – دەپ اتاپ ءوتتى.
دۇيسەن قاسەيىنوۆتىڭ كانديداتۋراسى اتقارۋشى كەڭەس پەن كونفەرەنتسيا قاتىسۋشىلارىنىڭ ءبىراۋىزدان قولداۋىنا يە بولدى. ونىڭ ICTMD ەلشىسى لاۋازىمىنا سايلانۋى قازاقستاننىڭ جانە تۇركسوي-عا مۇشە وزگە دە ەلدەردىڭ مادەنيەت جانە ونەر سالاسىنداعى حالىقارالىق ىنتىماقتاستىقتى دامىتۋداعى ماڭىزدى ءرولىن ايقىندايدى.
