الماتى حالىقارالىق اۋەجايىندا FlyArystan اۋەكومپانياسىنىڭ قىزمەتكەرىنە جولاۋشى شابۋىل جاسادى، دەپ حابارلايدى "ادىرنا" ۇلتتىق پورتالى.
اۋەاكومپانيانىڭ مالىمەتىنشە، وقيعا الماتى حالىقارالىق اۋەجايىندا بولعان.
«جولاۋشى تىركەۋ ۇستەلىنە ۇشۋعا 30 مينۋت قالعاندا كەلىپ، رەيسكە تىركەلگەنىن راستاعاننان كەيىن قاۋىپسىزدىك تەكسەرۋىنە ءوتۋ ءۇشىن باعىت العان. الايدا ول ۇلگەرمەگەن. وسىدان كەيىن جولاۋشى قايتادان تىركەۋ ايماعىنا كەلىپ، تەكسەرۋگە جىبەرگەن قىزمەتكەرگە اشۋىن كورسەتكەن. وقيعا بارىسىندا ول قىزمەتكەردىڭ تەلەفونىن لاقتىرىپ، وعان جۇدىرىقپەن سوققىلار جاساعان. بۇل اگرەسسيا بەينەباقىلاۋ كامەرالارىمەن جانە كۋاگەرلەرمەن راستالدى»، – دەلىنگەن FlyArystan-نىڭ Telegram ارناسىندا جاريالانعان حابارلامادا.
اۋەكومپانيا ۇشاققا وتىرۋ رەيس ۇشقانعا 30 مينۋت قالعاندا باستالاتىنىن ەسكە سالدى.
«دەسترۋكتيۆتى مىنەز-قۇلىق تانىتقان جولاۋشى قازىرگى زاڭنامالارعا سايكەس جاۋاپقا تارتىلادى. اۆياكومپانيا سونداي-اق قاۋىپسىزدىك ساياساتى اياسىندا ءتيىستى شارالار قولدانۋ قۇقىعىن ساقتايدى، سونىڭ ىشىندە ونى «قارا تىزىمگە» ەنگىزۋ مۇمكىندىگىن قاراستىرادى»، – دەپ حابارلادى كومپانيا.
