اقش-تىڭ سايلانعان پرەزيدەنتى دونالد ترامپ كانادانى 51-شتاتقا اينالدىرۋ تۋرالى داۋ تۋدىرعان ۇسىنىستارى اياسىندا كانادا اقش-قا قوسىلسا كارتا قانداي بولاتىنىن كورسەتەتىن ەكى بىردەي كارتا جاريالادى، دەپ حابارلايدى «ادىرنا» ۇلتتىق پورتالى.
ترامپتىڭ Truth Social الەۋمەتتىك جەلىسىندە كانادا اۋماعى اقش-تىڭ تۇسىمەن بويالعان جانە وندا "قۇراما شتاتتار" دەگەن قارا ءتۇستى جازۋ بار.
ەسكە سالساق، بۇعان دەيىن ترامپ Truth Social جەلىسىندە "ەگەر كانادا مەن اقش بىرىگەتىن بولسا", ەكى ەل دە پايدا كورەتىنىن جازعان. قاراشا ايىنىڭ سوڭىندا ول كانادادان اكەلىنەتىن يمپورتقا 25 پايىزدىق باج سالىعىن ەنگىزەتىنىن جاريالاعان بولاتىن.
كەيىن كانادا بيلىگى اقش-تىڭ سايلانعان پرەزيدەنتىنىڭ ۇسىنىسىنا ءۇزىلدى-كەسىلدى قارسىلىق ءبىلدىردى. ءوز پىكىرلەرىن ح الەۋمەتتىك جەلىسىندە كانادا پرەمەر-ءمينيسترى دجاستين تريۋدو مەن سىرتقى ىستەر ءمينيسترى مەلاني جولي جاريالادى.
"كانادانىڭ قۇراما شتاتتاردىڭ ءبىر بولىگى بولۋىنا ەشقانداي مۇمكىندىگى جوق. ەكى ەل دە ساۋدا مەن قاۋىپسىزدىك سالاسىنداعى ەڭ ءىرى سەرىكتەس بولعاندىقتان ۇتادى", – دەپ جازدى تريۋدو.
ال جولي ءوز كەزەگىندە، ترامپتىڭ بۇل پىكىرلەرى كانادانى مىقتى ەل ەتەتىن نارسەلەردى مۇلدە تۇسىنبەيتىنىن كورسەتتى دەپ مالىمدەدى.
