ازەربايجان اقپارات اگەنتتىكتەرى باكۋ – گروزنىي رەيسىنىڭ اپاتىنا قاتىستى ۆيدەو تاراتتى. كادرلاردا ۇشاق فيۋزەلياجىنداعى تەسىكتەر كورىنەدى. ولار وق نەمەسە سناريادتار ىزدەرىنە ۇقسايدى، دەپ حابارلايدى "ادىرنا" ۇلتتىق پورتالى arbat.media اگەنتتىگىنە سىلتەپ.
بۇل تابىلعان زاتتار قۇستارمەن سوقتىعىسۋ نەمەسە وتتەگى باللونىنىڭ جارىلۋى تۋرالى نۇسقالارعا كۇمانمەن قاراۋعا يتەرمەلەيدى.
ساراپشىلار سىرتقى اسەر تۋرالى بولجام جاساۋدا. بىراق رەسمي قورىتىندىلار تەك تەرگەۋ اياقتالعان سوڭ جاسالادى.
ەسكە سالايىق، ەكيپاج اپاتتان بۇرىن ۇشاقتىڭ كورپۋسىنا كۇشتى سوققى تيگەنى حابارلاعان.
بۇعان قوسا بۇگىن گروزنىي قالاسى ۋكراينا دروندارىنىڭ شابۋىلىنا ۇشىراعان ەدى. بۇل - اي ورتاسىنان بەرگى وسىنداي ەكىنشى مارتە جاسالعان شابۋىل. بۇل شابۋىلعا قارسى رەسەيدىڭ اۋە قورعانىسى جۇيەسى ىسكە قوسىلعان.
بۇگىن اقتاۋ ماڭىندا، اقشۇقىر ەلدى مەكەنىنە جاقىن تۇستا Azal Airlines اۋە كومپانياسىنا تيەسىلى جولاۋشىلار ۇشاعى قۇلاعان.
ازەربايجان پرەزيدەنتى يلحام اليەۆ تمد ەلدەرى باسشىلارىنىڭ بەيرەسمي سامميتىنە قاتىسۋ ءۇشىن سانكت-پەتەربۋرگكە اتتانىپ ۇشىپ بارا جاتقان كەزدە، اۋە اپاتى تۋرالى حابار بەرىلىپ، ورتا جولدان كەرى قايتۋعا ءماجبۇر بولعان. اقتاۋعا شۇعىل كوميسسيا اتتاندىرعان ازەربايجان پرەزيدەنتى اپات سەبەبى تۋرالى ايتۋعا ازىرگە ەرتە ەكەنىن ايتقان.
ال قازاقستان ۆيتسە-پرەمەرى قانات بوزىمباەۆ جۋرناليستەرگە بەرگەن سۇحباتىندا اقتاۋداعى اۋە اپاتىنان 38 ادامنىڭ قازا تاپقانىن مالىمدەگەن. ازەربايجان باق-ى مالىمەتىنشە، بورتتا 67 جولاۋشى جانە بەس ەكيپاج مۇشەسى بولعان. سونىمەن قاتار، ولار اپاتتىڭ سەبەبىن اۋە كەمەسىنىڭ قۇستارمەن سوقتىعىسۋىمەن بايلانىستىرعان.
بوزىمباەۆ سونداي-اق، قازا تاپقانداردىڭ دەنەلەرى قاتتى كۇيىپ كەتكەنىن ايتتى. سوندىقتان ولاردىڭ جەكە باسىن انىقتاۋ ءۇشىن بولەك پروتسەدۋرا جۇرگىزىلەتىنىن اتاپ ءوتتى. سونىمەن قاتار، ۆيتسە-پرەمەر 11 زارداپ شەگۋشىنىڭ جانساقتاۋ بولىمىندە ەكەنىن جەتكىزدى. زارداپ شەككەندەر اراسىندا 15 ازەربايجان ازاماتى، 9 رەسەي ازاماتى، 2 قىرعىزستان ازاماتى بار. تاعى ءۇش ادامنىڭ ازاماتتىعى ناقتىلانۋدا.
الدىن الا اقپارات بويىنشا، بورتتا بولعان قازاقستاننىڭ التى ازاماتىنىڭ التاۋى دا قازا بولعان.
