تالعار ماڭىندا كىسى قولىنان قازا تاپقان شەرزات بولاتتىڭ اعاسىنىڭ دەنەسى تابىلدى. بۇل تۋرالى بۇگىن، 9 جەلتوقساندا الماتى وبلىسىنىڭ پوليتسيا دەپارتامەنتى ايتتى، دەپ حابارلايدى «ادىرنا» ءتىلشىسى.
پوليتسەيلەردىڭ رەسمي تاراتقان مالىمەتىنە قاراعاندا ەر ادام ءوز-وزىنە قول جۇمساۋى مۇمكىن.
«مارقۇم بيىل 4 قازاندا قازا تاپقان شەرزات بولاتتىڭ اعاسى ەكەنى انىقتالدى. فاكت بويىنشا قىلمىستىق ءىس قوزعالدى. قازىرگى ۋاقىتتا بارلىق ءمان-جايدى انىقتاۋ ءۇشىن تەرگەۋ امالدارى ءجۇرىپ جاتىر»، – دەلىنگەن حابارلامادا.
پوليتسيا شەرزات بولاتتىڭ وتباسى قايعىلى جاعدايدان كەيىن پوليتسەيلەردىڭ قورعاۋىندا بولعانىن اتاپ ءوتتى.
«وسى ۋاقىتقا دەيىن مارقۇمنىڭ وتباسىنا تونگەن قانداي دا ءبىر قاۋىپ-قاتەر تىركەلگەن جوق. كۇزەتكەن قىزمەتكەرلەردىڭ تۇسىندىرمەلەرىنە سايكەس، ەر ادام كۇزەتىلەتىن وبەكتىدەن ساعات 23:30-دا شىعىپ كەتىپ، جەكە اۆتوكولىكپەن كەتكەنى انىقتالدى. تەرگەۋ مۇددەسى ءۇشىن وزگە دە اقپارات جاريالاۋعا جاتپايدى»،—دەپ تولىقتىردى پد ءباسپاسوز قىزمەتى.
شەرزات بولات تاراپىنىڭ ادۆوكاتى سايدا تاۋەكەلوۆا مارقۇمنىڭ اعاسى نۇرقانات عايىپباەۆتىڭ كوز جۇمعانىن راستادى.
ەسكە سالايىق، 16 جاستاعى شەرزات بولات 4 قازاندا دۇكەن ماڭىندا شىققان جانجالدان كەيىن كىسى قولىنان قازا تاپقان ەدى. شەرزات بولاتتىڭ ولىمىنە قاتىستى ءىس بويىنشا 11 ادام قاماۋعا الىندى.
