Embraer 190 جولاۋشىلار ۇشاعىنىڭ اقتاۋدا اپاتقا ۇشىراۋىنا بايلانىستى 26 جەلتوقسان ازەربايجاندا قارالى كۇن دەپ جاريالاندى، دەپ حابارلايدى "ادىرنا" ۇلتتىق پورتالى Azertac News Agency-گە سىلتەمە جاساپ.
پورتالدىڭ مالىمەتىنشە، ءتيىستى جارلىققا ازەربايجان پرەزيدەنتى يلحام اليەۆ قول قويعان.
25 جەلتوقساندا اقتاۋدا Azerbaijan Airlines اۋە كومپانياسىنىڭ جولاۋشىلار ۇشاعى اپاتقا ۇشىرادى. باكۋ قالاسىنان گروزنىيعا باعىت العان اۋە كەمەسى 11:20-دا اقتاۋدا شۇعىل قونۋعا سۇرانىس جاساعانى تۋرالى العاشقى اقپارات پايدا بولدى.
گروزنىي اۋەجايىنىڭ ءباسپاسوز قىزمەتىنىڭ مالىمەتىنشە، باعىتىن وزگەرتۋگە قالىڭ تۇمان سەبەپ بولعان. ۇشاق اۋەلى ماحاچقالاعا، كەيىن اقتاۋعا باعىتتالدى. باستاپقىدا ۇشاق قاتتى قونۋ جاسادى دەپ حابارلانعانىمەن، كەيىن اۋە كەمەسىنىڭ قۇلاعانى بەلگىلى بولدى.
باق مالىمەتىنشە، اپاتتىڭ سەبەبى ۇشاقتىڭ قۇستار توبىمەن سوقتىعىسۋى بولعان.
توتەنشە جاعدايلار مينيسترلىگىنىڭ مالىمەتىنشە، ۇشاق بورتىندا 67 ادام، ونىڭ ىشىندە 5 ەكيپاج مۇشەسى بولعان.
ماڭعىستاۋ وبلىستىق دەنساۋلىق ساقتاۋ باسقارماسىنىڭ حابارلاۋىنشا، اپات ورنىنان 22 ادام ءارتۇرلى جاراقاتتارمەن وبلىستىق اۋرۋحاناعا جەتكىزىلگەن.
وقيعانىڭ ءمان-جايى انىقتالۋدا. قازاقستاننىڭ كولىك مينيسترلىگى ارنايى تەرگەۋ جۇرگىزىلەتىنىن حابارلادى.
