سيريانىڭ بۇرىنعى پرەزيدەنتى باشار اسادتىڭ اجىراسۋى جانە ونىڭ اكتيۆتەرىنىڭ بۇعاتتالۋى تۋرالى اقپارات شىندىققا جاناسپايدى. بۇل تۋرالى بۇگىن، 23 جەلتوقساندا رەسەي پرەزيدەنتىنىڭ ءباسپاسوز حاتشىسى دميتري پەسكوۆ ايتتى، دەپ حابارلايدى «ادىرنا» ءتىلشىسى.
بۇعان دەيىن تۇركيالىق Haberturk باسىلىمى رەسەي بيلىگىنىڭ اسادقا ماسكەۋدەن كەتۋگە جانە ساياسي قىزمەتپەن اينالىسۋعا تىيىم سالعانىن، ال ونىڭ ايەلى اسما اسادتىڭ لوندونعا كوشۋ ءۇشىن اجىراسۋعا ءوتىنىش بەرگەنىن جازعان ەدى.
«ەكس-پرەزيدەنتتىڭ زايىبىنا ماسكەۋدەگى ءومىر ۇناماعان. وسىعان بايلانىستى ول لوندونعا قونىس اۋدارۋدى جوسپارلاپ وتىر. اسما اساد نەكەسىن بۇزۋ ءۇشىن رەسەيلىك سوت ورگاندارىنا جۇگىنگەن. دەسە دە، ونىڭ ارىزى ءالى قاراستىرىلماعان»،—دەدى شەتەلدىك باق.
الايدا دميتري پەسكوۆ ربك جۋرناليستەرىنە بەرگەن سۇقباتىندا بۇل اقپاراتتاردى جوققا شىعاردى.
«بۇل مالىمەتتەر شىندىققا جاناسپايدى»،—دەپ جاۋاپ بەردى ول.
ەسكە سالايىق، 8 جەلتوقسانعا قاراعان ءتۇنى سيرياداعى ون كۇنگە سوزىلعان قاقتىعىستاردان كەيىن، كوتەرىلىسشىلەر ۇكىمەتكە قارسى ارەكەتتەرىن جالعاستىرىپ، ەل استاناسى داماسكتى باقىلاۋىنا العان بولاتىن. بۇل شايقاستار ەلدىڭ سولتۇستىك-باتىسىنداعى يدليب پروۆينتسياسىندا باستالدى. پرەزيدەنت باشار اساد جاعدايدىڭ ۋشىعۋىنا بايلانىستى شۇعىل تۇردە استانانى تاستاپ كەتۋگە ءماجبۇر بولدى. كەيىنىرەك اسادتىڭ وتباسى مۇشەلەرىمەن بىرگە رەسەي استاناسىنا كەلىپ-جەتكەنى، وعان گۋمانيتارلىق سەبەپتەرمەن ساياسي باسپانا بەرىلگەنى انىقتالدى.
