اقش-تىڭ قىرعىزستانداعى ەلشىلىگى پرەزيدەنت سادىر جاپاروۆتىڭ جەرگىلىكتى تاۋەلسىز باق-تى «امەريكانىڭ قارجىلاندىرۋى» تۋرالى ايىپتاۋىنا جاۋاپ بەرە وتىرىپ، جۋرناليستەرگە قارجىلاي قولداۋ كورسەتەتىنىن ايتتى. ديپلوماتيالىق ميسسيانىڭ ءباسپاسوز قىزمەتى وسىعان بايلانىستى مالىمدەمەنى X الەۋمەتتىك جەلىسىندەگى پاراقشاسىندا جاريالادى، دەپ حابارلايدى "ادىرنا" ۇلتتىق پورتالى.
«جۋرناليستيكا سالاسىنداعى كومەگىمىز فاكتچەكينگ باعدارلامالارىن قارجىلاندىرۋعا، قىرعىز تىلىندەگى جۋرناليستيكانى قولداۋعا جانە قۇقىق بۇزۋشىلىقتاردى، سونىڭ ىشىندە سىبايلاس جەمقورلىقتى اشاتىن تەرگەۋشى جۋرناليستەرگە قولداۋ كورسەتۋگە باعىتتالعان»، – دەلىنگەن ەلشىلىك مالىمدەمەسىندە.
امەريكالىق ديپلوماتتار سونداي-اق تاۋەلسىز باق ازاماتتاردىڭ سۇرانىستارىنا ءتيىمدى جاۋاپ بەرۋ تۇرعىسىنان بيلىك ءۇشىن ماڭىزدى ەكەنىن اتاپ ءوتتى. سونىمەن قاتار، ەلشىلىك باعدارلامالارى قىرعىزستان ۇكىمەتىمەن ىنتىماقتاستىقتا جۇزەگە اسىرىلاتىنى جانە ادىلەتتى، قاۋىپسىز ءارى گۇلدەنگەن رەسپۋبليكانى قولداۋعا باعىتتالعانى ايتىلدى.
21 جەلتوقساندا ءۇشىنشى حالىق قۇرىلتايىندا سويلەگەن سوزىندە سادىر جاپاروۆ كوپتەگەن قىرعىزستاندىق تاۋەلسىز باسىلىمداردىڭ «شەتەلدىك دەمەۋشىلەرى» بار ەكەنىن ايتتى. وسى سەبەپتى ول باق-تى «ءسوز بوستاندىعىنان ايىرىلعان» دەپ اتادى، ويتكەنى ولار تولىعىمەن «يەلەرىنە» باعىنادى.
«ولار مۇندا جالعان اقپارات تاراتىپ، تەرىس اقپارات ىزدەيدى، باسقالاردىڭ بەدەلىنە نۇقسان كەلتىرەدى. ال ولارعا سوتقا شاعىم تۇسىرگەندە، بىردەن ءسوز بوستاندىعىنا قىسىم جاسالدى دەپ ايىپتايدى»، – دەپ اتاپ ءوتتى پرەزيدەنت.
مەملەكەت باسشىسى ءوز ءسوزىن راستاۋ ءۇشىن دەرەكتەر كەلتىردى، مىسالى، «كلووپ مەديا» 2022 جىلى اقش ەلشىلىگىنەن $25 250 العان.
پرەزيدەنت سونداي-اق اقش-تان باق-تى قولداۋعا قاجەتتى قاراجاتتى قىرعىزستان ۇكىمەتىنە تىكەلەي بەرۋدى ۇسىندى.
«ءبىز ولاردىڭ ءتيىمدى پايدالانىلۋىن قامتاماسىز ەتەمىز. جۋرناليستيكا دەڭگەيىن كوتەرۋ كەرەك پە؟ ءبىز ونى جۇزەگە اسىرامىز. ءسوز بوستاندىعىن تولىق قامتاماسىز ەتكىڭىز كەلە مە؟ ءبىز ونى دا كەپىلدەندىرەمىز»، – دەپ سەندىردى جاپاروۆ.
