ۇكىمەت جانىنان قۇرىلعان اەس قۇرىلىسى بويىنشا ارنايى كوميسسيا جۇمىسىن جەدەلدەتىپ، كونسورتسيۋمعا قاتىسۋشىلار بويىنشا شەشىم 2025 جىلدىڭ ءبىرىنشى جارتىسىندا قابىلدانادى، دەپ حابارلايدى "ادىرنا" ۇلتتىق پورتالى. بۇل تۋرالى ەنەرگەتيكا ءمينيسترى الماسادام ساتقاليەۆ مالىمدەدى.
«باستاپقىدا كەلەسى جىلى وسى پروتسەستىڭ جەڭىمپازى بويىنشا تۇپكىلىكتى شەشىم قابىلداۋ جوسپارلانعان بولاتىن. پرەزيدەنتتىڭ سوڭعى تاپسىرماسىنا سايكەس، كوميسسيا وسى جۇمىستى جەدەلدەتىپ، ءتيىستى شەشىمدى جاقىن ارادا قابىلداۋعا بار كۇشىن سالادى. 2025 جىلدىڭ ءبىرىنشى جارتىسىندا شەشىم قابىلدانادى»، – دەدى ساتقاليەۆ.
ءمينيستردىڭ ايتۋىنشا، كومپانيالار قازاقستانعا مەرزىمدەر مەن شىعىنداردى وڭتايلاندىرۋدى قامتاماسىز ەتەتىن ۇسىنىستار بەرۋى كەرەك.
«الەمدە قىتايدىڭ ۇلتتىق اتوم كومپانياسى پاكىستاندا التى جىل ىشىندە ەنەرگوبلوك سالعانى تۋرالى مىسال بار. قازىرگى زامانعى تەحنولوگيالار جىلدام شەشىمدەر قابىلداۋعا مۇمكىندىك بەرەدى»، – دەپ ءتۇسىندىردى ول.
سونىمەن بىرگە، ساتقاليەۆتىڭ ايتۋىنشا، اتوم ەلەكتر ستانتسياسىن سالۋ – ۇزاق مەرزىمدى پروتسەسس. ادەتتە، جوبالاۋ ءۇش جىلعا سوزىلادى، ال «ءبىرىنشى بەتوننان باستاپ ءبىرىنشى بلوكتىڭ تولىق اياقتالۋىنا دەيىنگى» قۇرىلىس مەرزىمى 8-دەن 14 جىلعا دەيىن سوزىلادى.
«قازاقستان ءۇشىن بۇل مەرزىمدەر قولايسىز. ءبىز جۇمىستى ۇيىمداستىرىپ، ءوزىمىزدىڭ قۇزىرەتتەرىمىزدى دامىتىپ، حالىقارالىق تاجىريبەنى پايدالانۋىمىز كەرەك. سونداي-اق، ۆەندورلارمەن جوعارى ساپالى ۇسىنىستار جاساۋ بويىنشا جان-جاقتى جۇمىس جۇرگىزۋ قاجەت»، – دەپ اتاپ ءوتتى مينيستر.
پرەزيدەنت قاسىم-جومارت توقاەۆ ەنەرگەتيكا مينيسترىنە اەس قۇرىلىسى بويىنشا جۇمىستى جەدەلدەتۋدى تاپسىرعان بولاتىن. رەفەرەندۋمنان كەيىن مەملەكەت باسشىسى اتوم ەلەكتر ستانتسياسىن سالۋ ءۇشىن بىرنەشە ەلدىڭ كونسورتسيۋمىن قۇرۋ جوسپارلارى تۋرالى مالىمدەگەن ەدى.
فرانتسيا مەن قىتاي بۇل جوباعا قاتىسۋعا دايىن ەكەنىن بىلدىرسە، رەسەي پرەزيدەنتى «روساتومنىڭ» قازاقستانداعى اەس قۇرىلىسىنا قاتىسۋعا دايىن ەكەنىن ايتقان.
