كاسىپكەر قانات امىركين جول قۇرىلىس كومپانياسىنىڭ رەيدەرلىككە ۇشىراعانىن ايتىپ بەردى، دەپ حابارلايدى "ادىرنا" ۇلتتىق پورتالى قازتاگ اگەنتتىگىنە سىلتەمە جاساپ.
«كوپشىلىگىڭىز نىعماتۋليندەر وتباسىن بىلەسىزدەر. مىنە، سول وتباسىنىڭ ۇلكەن ۇلى مەنىڭ ءىرى ميلليونداعان كەلىسىمشارتى بار جول-قۇرىلىس كومپانيامدى تارتىپ الدى. ول مەنى Qazaq Banki بانكىنەن نەسيە الۋعا ماجبۇرلەدى. كەيىن بۇل بانك بانكروتقا ۇشىراپ، وزىمەن بىرگە مەنىڭ اقشامدى جانە كەپىلگە قويىلعان مۇلىكتى الىپ كەتتى. سونىڭ ىشىندە اۆتوسالون سالۋعا ارنالعان جەر ۋچاسكەسى دە بار. سونىمەن قاتار، ولار مەنى بانك كەپىلدىگى بويىنشا دا ايلا-شارعىعا سالدى»، – دەپ جازدى قانات امىركىن ءوزىنىڭ Facebook پاراقشاسىندا.
ونىڭ ايتۋىنشا، ول نەسيە راسىمدەگەنىمەن، بۇل وقيعا مۇنىمەن اياقتالماعان. ودان قولما-قول اقشا تالاپ ەتكەن. كاسىپكەر وتباسىنا قاۋىپ تونگەندىكتەن قازاقستاننان كەتۋگە ءماجبۇر بولعانىن ايتتى.
«ولار وزدەرى قاشقىنعا اينالعاندا، دۋبايعا مەنىمەن كەزدەسۋگە كەلىپ، "داۋ-دامايدى دوعارايىق" دەپ ءوتىندى. كەزدەسۋ بارىسىندا مەن وعان تەك كولىك تۇرىندە عانا 7-8 ميلليون دوللار كولەمىندە قاراجات العانىن ەسىنە سالدىم. بۇعان ول، جارتىسى عانا وزىنە جەتكەنىن، قالعانىن كومەكشىلەرى العانىن ايتتى. مەنىڭ ەلدەن ءماجبۇرلى تۇردە كەتكەنىمنەن كەيىن، كومپانيا مۇلكىنە بايلانىستى جينالعان سالىق قارىزىن سالىق ورگانى مەنىڭ موينىما ىلمەك بولعاندا، مەن وعان قوڭىراۋ شالدىم. مۇنىڭ شەكتەن شىققان ارەكەت ەكەنىن ايتىپ، سالىقتى وزدەرىنىڭ جابۋىن ۇسىندىم. ويتكەنى ءبارىن تارتىپ الدى. "ماعان ءبارىبىر، مەن ەندى قازاقستاننىڭ ازاماتى ەمەسپىن. ماسەلەڭدى ءوزىڭ شەش" دەپ قىسقا عانا جاۋاپ بەردى. وسىنداي دەڭگەيدەگى تسينيزم مەن جاۋاپسىزدىق... مۇنداي ادامدار بيلىكتە قالاي بولعان؟» – دەپ اڭگىمەلەدى كاسىپكەر.
كەيىن امىركين قازاقستانعا ورالعان. ال 25 جەلتوقساندا سوت ونى 239 ميلليون تەڭگە سالىقتى جانە 7 ميلليون تەڭگە باج سالىعىن تولەۋگە مىندەتتەدى.
