2024 jyl 26 qarasha kúni Astanada Maqsut Narikbayev University bilim alýshylaryna arnalǵan jyl saıynǵy stýdentter qataryna qabyldaý rásimi ótti. Is-shara 5000-nan astam qatysýshyny jınap, ýnıversıtet úshin mańyzdy oqıǵa boldy. Bul kesh jańa stýdentterdi akademııalyq qoǵamdastyqqa qabyldaýdyń mańyzdylyǵyn atap ótti. Tórt mekteptiń stýdentteri — Halyqaralyq ekonomıka mektebi, Joǵary quqyq mektebi, Joǵary gýmanıtarlyq mektep jáne Halyqaralyq jýrnalıstıka mektebi — is-sharanyń bas júldesi stýdentter qataryna qabyldaý keshiniń kýbogy úshin baq synasty.
1995 jyldan beri ótkizilip kele jatqan stýdentter qataryna qabyldaý rásimi jyl saıyn aýqymyn keńeıtip, ýnıversıtet pen bilim berý qaýymdastyǵy úshin mańyzdy oqıǵaǵa aınaldy. Bıylǵy sharanyń basty ıdeıasy QR Prezıdenti Qasym-Jomart Kemeluly Toqaev Ulttyq Quryltaıda atap ótken qazaqstandyqtardyń alty negizgi qundylyǵymen úndestik tapty: táýelsizdik pen otanshyldyq, birlik pen yntymaq, ádildik pen jaýapkershilik, zań men tártip, eńbekqorlyq pen kásibı biliktilik, jasampazdyq pen jańashyldyq. Osy qundylyqtar jastardyń azamattyq ustanymyn nyǵaıtyp, el bolashaǵyna degen jaýapkershilik sezimin arttyrýdyń negizine aınaldy.
Jerebe tartý arqyly ár mektepke óz taqyryby bekitilip, olardy is-shara aıasynda kórneki túrde tanystyrý mindeti júkteldi. Joǵary gýmanıtarlyq mektep «Táýelsizdik pen otanshyldyq» taqyrybyn sheber usynsa, Joǵary quqyq mektebi — «Birlik pen yntymaq» qundylyqtaryn aıshyqtady. Halyqaralyq ekonomıka mektebi «Zań men tártip» ustanymyn, Halyqaralyq jýrnalıstıka mektebi «Eńbekqorlyq pen kásibı biliktilik» qundylyqtaryn erekshe kreatıvpen jetkizdi.
Sondaı-aq kesh baǵdarlamasynyń aıasynda erekshe oqıǵa oryn aldy — Qazaqstannyń eń úlken týy ashyldy. Aýmaǵy 800 sharshy metrdi quraıtyn, salmaǵy shamamen 60 kılogramm jibek tý – eldiń bolashaǵyna degen asqaq armannyń jáne Otanǵa degen sheksiz maqtanyshtyń sımvolyn beıneledi.
Saltanatty rásim Jaqsylyq Úshkempirov atyndaǵy Jekpe-jek saraıynda ótti, onda stýdentter teatrlandyrylǵan qoıylymdar men áleýmettik jobalaryn kópshilik nazaryna usyndy. Barlyq fakýltetter urpaqtan-urpaqqa mura bolyp kele jatqan qurmetti kýbokty ıelený jolynda qyzý básekege tústi.
Bıylǵy jyly Halyqaralyq ekonomıka mektebi laıyqty jeńisine qol jetkizip, qurmetti stýdentter qataryna qabyldaý kýbogynyń ıegeri atandy.
Bul mańyzdy sharaǵa daıyndyq úsh aıǵa sozyldy. Repetıııalar, jattyǵýlar jáne shyǵarmashylyq jumystar – stýdentterdiń joǵary uıymdastyrýshylyq qabiletin, úılesimdi komandalyq rýhyn jáne shynaıy yntasyn kórsetken tamasha múmkindikke aınaldy.
Keshtiń basty hedlaıneri tanymal Irina Kairatovna toby boldy. Olardyń óneri sharaǵa erekshe qýat pen pozıtıv syılap, saltanatty keshtiń jarqyn núktesin qoıdy.
