28 قاراشا كۇنى ۇقشۇ ۇجىمدىق قاۋىپسىزدىك كەڭەسىنىڭ وتىرىسى وتەدى. بۇل تۋرالى بۇگىن ۇيىمنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«2024 جىلعى 28 قاراشا كۇنى استانادا سىرتقى ىستەر مينيسترلەرى كەڭەسىنىڭ، قورعانىس مينيسترلەرى كەڭەسىنىڭ جانە قاۋىپسىزدىك كەڭەستەرى حاتشىلارى كوميتەتىنىڭ بىرلەسكەن وتىرىسى، سونداي-اق ۇقشۇ ۇجىمدىق قاۋىپسىزدىك كەڭەسىنىڭ وتىرىسى وتەدى»، - دەلىنگەن حابارلامادا.
ءىس-شارادا ۇجىمدىق قاۋىپسىزدىك وڭىرلەرىندەگى وزەكتى ماسەلەلەر بويىنشا پىكىر الماسۋ، ۇلى جەڭىس كۇنىنىڭ 80 جىلدىعىن بىرلەسىپ مەرەكەلەۋ جوسپارلارىن تالقىلاۋ كوزدەلىپ وتىر. سونداي-اق قىرعىزستان 2025 جىلى ۇقشۇ-عا توراعالىق ەتۋ كەزەڭىندەگى باسىمدىقتارىن ۇسىناتىن بولادى.
بۇعان دەيىن مەملەكەتتىك كۇزەت قىزمەتى ۇقشۇ ۇجىمدىق قاۋىپسىزدىك كەڭەسى وتىرىسىن وتكىزۋ جانە وعان ازىرلىك اياسىندا 27-28 قاراشا كۇندەرى ەلوردا كوشەلەرىنىڭ جەكەلەگەن بولىگىندە كولىك قۇرالدارىنىڭ جۇرۋىنە ۋاقىتشا شەكتەۋ قويىلاتىنىن ايتقان ەدى.
