قازاقستاندا ءتورتىنشى مۇناي وڭدەۋ زاۋىتى سالىنادى. بۇل تۋرالى ەنەرگەتيكا ءمينيسترى الماسادام ساتقاليەۆ ماجىلىستە وتكەن ۇكىمەت ساعاتىندا ايتتى، دەپ حابارلايدى «ادىرنا» ءتىلشىسى.
«2036 جىلى كۇتىلەتىن جەڭىل مۇناي ونىمدەرىنىڭ تاپشىلىعىنا بايلانىستى قۋاتى جىلىنا 10 ملن توننا بولاتىن جاڭا مۇناي وڭدەۋ زاۋىتىن سالۋ ماسەلەسىن قاراستىرىپ جاتىرمىز. 2030 جىلدان كەشىكتىرمەي جوبالاۋدى باستاساق، 2032 جىلى قۇرىلىسىنا كىرىسۋ كوزدەلگەن»،—دەدى ول.
ءمينيستردىڭ سوزىنشە، جاڭا ءموز سالۋ ەلدىڭ 2040-2050 جىلدار ارالىعىندا جانار-جاعارماي قاجەتتىلىگىن قامتاماسىز ەتىپ، مۇناي ونىمدەرىن ورتالىق، وڭتۇستىك جانە وڭتۇستىك-باتىس ازيانىڭ قارقىندى دامىپ كەلە جاتقان نارىقتارىنا ەكسپورتتاۋ مۇمكىندىگىن اشادى.
ايتا كەتەيىك، قازىرگى تاڭدا پاۆلودار، اتىراۋدا جانە وڭتۇستىك قازاقستان وبلىسىندا مۇناي وڭدەۋ زاۋىتى بار. الايدا بۇل زاۋىتتار قازاقستاندىقتاردىڭ سۇرانىسىن تولىق وتەي الماي كەلەدى.
ءتورتىنشى مۇناي وڭدەۋ زاۋىتىن سالۋ ماسەلەسى 2015 جىلى كوتەرىلگەن ەدى. سول جىلدارى ءموز 2021 جىلدىڭ II توقسانىندا ىسكە قوسىلۋى مۇمكىن دەگەن اقپارات تارادى. الايدا جوبا جۇزەگە اسپادى.
