مەملەكەت باسشىسى قاسىم-جومارت توقاەۆ بۇگىن، 25 قاراشادا قورعانىس ءمينيسترى رۋسلان جاقسىلىقوۆتى قابىلدادى. بۇل تۋرالى اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
پرەزيدەنتكە بولىمشەلەردىڭ جاۋىنگەرلىك دايىندىعى مەن قارۋلى كۇشتەر قاتارىنا كۇزگى شاقىرۋ ناۋقانىنىڭ ناتيجەلەرى، سونداي-اق اسكەري قىزمەتتەگى ءتارتىپ پەن قاۋىپسىزدىكتى نىعايتۋعا، اسكەري قىزمەتشىلەردىڭ الەۋمەتتىك مارتەبەسى مەن جالاقىسىن ارتتىرۋعا باعىتتالعان شارالار جونىندە باياندالدى.
ارميانىڭ جاۋىنگەرلىك الەۋەتىن كەزەڭ-كەزەڭىمەن كوتەرۋ جانە اسكەردى دايارلاۋدىڭ جاڭا تاسىلدەرىنە كوشۋ ماسەلەلەرىنە ايرىقشا نازار اۋدارىلدى.
رۋسلان جاقسىلىقوۆ مەملەكەتتىك قورعانىس تاپسىرىسىنىڭ ورىندالۋ بارىسى تۋرالى بايانداپ، اسكەردىڭ قارۋ-جاراق پەن تەحنيكانىڭ جاڭا ۇلگىلەرىمەن، اتاپ ايتقاندا، ۇشقىشسىز باسقارىلاتىن اۆياتسيالىق جۇيەلەرىمەن، راديوەلەكتروندىق كۇرەس كەشەندەرىمەن جاراقتاندىرىلىپ جاتقانىن حاباردار ەتتى. بۇدان بولەك، جاۋىنگەرلىك ماشينالاردى جانە بايلانىس قۇرالدارىن جاڭعىرتۋ، راتسيوناليزاتورلىق جۇمىستى، سونداي-اق اسكەري ينفراقۇرىلىمدى دامىتۋ ماسەلەلەرى قاراستىرىلدى.
قاسىم-جومارت توقاەۆ ەلىمىزدىڭ بىتىمگەرلىك كونتينگەنتىنىڭ بۇۇ اياسىندا گولان جوتالارىندا اتقارىپ جاتقان قىزمەتى ماڭىزدى ەكەنىن اتاپ ءوتتى.
كەزدەسۋ سوڭىندا جوعارعى باس قولباسشى قاسىم-جومارت توقاەۆ مينيسترگە وتاندىق قورعانىس كاسىپورىندارىمەن ءوزارا ىقپالداستىقتى جانداندىرۋ، اۋماقتىق قورعانىس پەن ارنايى وپەراتسيا كۇشتەرىن دامىتۋ، الەۋمەتتىك-قۇقىقتىق جۇمىستى كۇشەيتۋ جونىندە ناقتى مىندەتتەر جۇكتەدى.
ايتا كەتەيىك، 28 قاراشا كۇنى استانادا ۇقشۇ ەلدەرى سىرتقى ىستەر، قورعانىس مينيسترلەرىنىڭ، قاۋىپسىزدىڭ كەڭەسى حاتشىلارىنىڭ وتىرىسى جانە قاۋىپسىزدىك كەڭەسىنىڭ سەسسياسى وتەدى دەپ جوسپارلانىپ وتىر.
