بۇگىن ماجىلىستەگى ۇكىمەت ساعاتىندا ەنەرگەتيكا ءمينيسترى الماسادام ساتقاليەۆ مۇناي ءوندىرۋ كولەمدەرى جوسپارلانعاننان تومەن بولعانىن مالىمدەدى، دەپ حابارلايدى «ادىرنا» ءتىلشىسى.
ول 10 ايدىڭ قورىتىندىسى بويىنشا مۇناي ءوندىرۋ كولەمى 73,5 ميلليون توننانى قۇراعانىن ايتتى.
«بيىلعا ارنالعان ءوندىرىس بولجامى – 88,4 ميلليون توننا. ءوندىرىستىڭ جوسپارمەن سالىستىرعاندا تومەندەۋى تەڭىز جانە قاشاعان سياقتى ءىرى كەن ورىندارىندا كۇردەلى جوندەۋ جۇمىستارىنىڭ جۇرگىزىلۋىمەن بايلانىستى بولىپ وتىر. سونداي-اق بۇل جاعدايعا قاراشىعاناق كەن ورنىنداعى جوسپاردان تىس جۇمىستىڭ توقتاۋى مەن ورىنبور گاز وڭدەۋ زاۋىتىندا گاز الۋعا شەكتەۋلەر اسەر ەتتى. ءوندىرىس دەڭگەيىنىڭ تومەندەۋىنە وپەك+ كەلىسىمى بويىنشا مىندەتتەمەلەردىڭ ورىندالۋى دا ىقپال ەتىپ وتىر»،— دەدى ول.
مينيستر بۇل ماسەلەنى شەشۋ ءۇشىن جەتىلگەن كەن ورىندارىن، ونىڭ ىشىندە سالىقتىق سيپاتتاعى، ءوندىرۋدىڭ جاڭا تەحنولوگيالارىن دامىتۋعا جانە ەنگىزۋگە مىندەتتى تۇردە قايتا ينۆەستيتسيالاۋ شارتىمەن قولداۋ شارالارى ازىرلەنگەنىن جەتكىزدى.
ايتا كەتەيىك، بۇعان دەيىن ەلىمىزدە ءتورتىنشى مۇناي وڭدەۋ زاۋىتىنىڭ قۇرىلىسى 2030 جىلى باستالاتىنىن جازعان ەدىك.
