ەندى مەكتەپ وقۋشىلارى «بولاشاق» باعدارلاماسىمەن شەتەلدە ءبىلىم الا الادى. بۇل تۋرالى دەپۋتات اسحات ايماعامبەتوۆ ايتتى، دەپ حابارلايدى «ادىرنا» ءتىلشىسى.
ول باعدارلاما بويىنشا مەكتەپتە حالىقارالىق وليمپيادالار مەن عىلىمي جوبالار كونكۋرستارىندا جەڭىسكە جەتكەن تالاپكەرلەرگە شەتەلدە باكالاۆرياتتا ءبىلىم الۋعا مۇمكىندىك بەرۋ ۇسىنىلعانىن اتاپ ءوتتى.
«جەتەكشى شەتەلدىك ۋنيۆەرسيتەتتەر حالىقارالىق وليمپيادالاردىڭ جەڭىمپازدارىنا بىردەن باكالاۆرياتقا گرانت ۇسىنادى، سونىڭ ناتيجەسىندە ولار شەتەلگە كەتىپ قالادى. وسى كەزەڭدە ءبىز ءتيىستى قولداۋ ۇسىنا المادىق، سوندىقتان ءبىز ءجيى مۇنداي دارىندى جاستاردان ايىرىلىپ قالدىق. ولار تەك شەتەلدە ءبىلىم الىپ قويماي، كەيىن سول جاقتا قالىپ قوياتىن ەدى»، – دەدى ايماعامبەتوۆ.
دەپۋتاتتىڭ پىكىرىنشە، دارىندى بالالارعا مەملەكەتتىك بيۋدجەت ەسەبىنەن گرانت بەرۋ – ماڭىزدى قادام.
«ەندى «بولاشاق» باعدارلاماسى ەڭ دارىندى وقۋشىلار ءۇشىن باكالاۆرياتتان باستاپ قولجەتىمدى بولادى. بۇل – جاس تالانتتاردى قولداپ، ولاردى ەلدە ۇستاۋعا مۇمكىندىك بەرەتىن ماڭىزدى جاڭاشىلدىق. ولار الەمنىڭ ۇزدىك جوعارى وقۋ ورىندارىندا ءبىلىم الىپ، كەيىن ەلگە ورالىپ، قازاقستاننىڭ دامۋىنا ءوز ۇلەستەرىن قوسادى. دارىندى بالالاردى قولداۋ – ولاردىڭ بولاشاعىنا سالىنعان ينۆەستيتسيا عانا ەمەس، بۇل قازاقستاننىڭ دامۋىنا باعىتتالعان ستراتەگيالىق قادام»، - دەپ تولىقتىردى ول.
ايتا كەتەيىك، قازىر «بولاشاق» باعدارلاماسى تەك ماگيستراتۋرا مەن دوكتورانتۋراعا ارنالعان.
