الماتى قالاسىندا قيىن ومىرلىك جاعدايعا تاپ بولعان بالالى ايەلدەرگە ارنالعان جاڭارتىلعان «اسار» داعدارىس ورتالىعىنىڭ رەسمي تۇساۋكەسەرى ءوتتى. تيمۋر مەن دينارا قۇلىباەۆتار قۇرعان «Halyk» جەكە قايىرىمدىلىق قورىنىڭ قولداۋىمەن جۇزەگە اسقان بۇل جوبا، اجىراسۋدىڭ الدىندا تۇرعان وتباسىلارعا جاعداي جاساۋداعى ماڭىزدى قادام بولدى.
«اسار» ورتالىعى 2017 جىلى الماتى قالاسىنىڭ SOS بالالار اۋىلىنىڭ بازاسىندا قۇرىلدى جانە سودان بەرى قولداۋ مەن قورعاۋدى قاجەت ەتەتىن بالالى ايەلدەرگە كومەك كورسەتىپ كەلەدى.
ورتالىققا 2024 جىلى «Halyk» قورىنىڭ دەمەۋشىلىگىمەن كۇردەلى جوندەۋ جۇمىستارى جۇرگىزىلىپ، تۇرمىستىق جاعداي جاقساردى. ورتالىق ءبىر ۋاقىتتا التى وتباسىن قابىلداي الادى، ولار ءۇشىن جەكە بولمەلەر مەن ورتاق اۋماقتار قاراستىرىلعان. نەگىزگى ماقساتتارى: التى ايعا دەيىن ۋاقىتشا باسپانا بەرۋ، مەديتسينالىق، زاڭدىق، پسيحولوگيالىق قولداۋ، جۇمىسقا ورنالاسۋعا جانە قايتا وقۋعا كومەك كورسەتۋ، بالالارعا قامقورلىق جاساۋ داعدىلارىن نىعايتۋ.
«اسار»: ءار وتباسىعا قامقورلىق
«اسار» ورتالىعىنىڭ ەرەكشەلىگى - ايەلدەرمەن جۇمىس بارىسىندا ءار جاعدايعا جەكە قاراۋعا مۇمكىندىك بەرەتىن وزىق حالىقارالىق ادىستەمەلەردى قولدانۋىندا. وسى ادىستەمە ارقىلى ورتالىقتاعى ءاربىر ايەلگە داعدارىستان شىعۋدىڭ كەزەڭ-كەزەڭدىك جەكە جوسپار جاسالىپ، ونى جۇزەگە اسىراتىن مامان بەكىتىلەدى.
«باستى جەتىستىك – اتا-انالاردىڭ وزىنە دەگەن سەنىمدىلىگىن ارتتىرۋ جانە قيىندىقتاردى ءوز بەتىنشە جەڭۋ قابىلەتتەرىن دامىتۋ. باعدارلاما اياسىندا ءبىز وتباسىلارمەن بايلانىستا بولامىز جانە ولاردىڭ ءال-اۋقاتىن باقىلاۋدى جالعاستىرامىز»، - دەيدى SOS بالالار اۋىلى قازاقستان كورپوراتيۆتىك قورىنىڭ ۇلتتىق ديرەكتورى گۇلجان اسانوۆا.
ورتالىق اشىلعان كۇنىنەن باستاپ 150-دەن استام بالا اناسىنان اجىراماي، 80-نەن استام ايەل ۋاقىتشا باسپانا جانە قولداۋ الدى. ولاردىڭ 90%-دان استامى ءوز بەتتەرىنشە ءومىر ءسۇرىپ، ماماندىق الىپ، جۇمىس تاۋىپ، تۇراقتى باسپاناعا قول جەتكىزدى.
ءبىر وتباسىنىڭ تاريحى: جاڭا ومىرگە قادام
«ەرتەڭ قايدا قوناتىنىمىزدى بىلمەي جۇرگەن قيىن ساتتەردە، ورتالىق تۋرالى اقپارات بىزگە ناعىز قۇتقارۋشىمىزداي كورىندى». ورتالىقتىڭ قولداۋىنىڭ ارقاسىندا اينۇر جاڭا ماماندىق يگەرىپ، كاسىبي دەڭگەيىن جاڭا ساتىعا كوتەرگەن. «ورتالىق قىزمەتكەرلەرىنە جانە «Halyk» قايىرىمدىلىق قورىنا العىسىم شەكسىز»، - دەيدى ءۇش بالانىڭ اناسى، «اسار» ورتالىعىنىڭ بۇرىنعى تۇرعىنى اينۇر (اتى وزگەرتىلگەن).
SOS قازاقستاننىڭ بالالار اۋىلدارى: جەتىمدىكتىڭ الدىن الۋ
قازاقستاندا 1994 جىلدان بەرى جۇمىس ىستەپ كەلە جاتقان SOS بالالار اۋىلدارى اتا-اناسىنىڭ قامقورلىعىنسىز قالعان بالالارعا وتباسىلىق جاعداي جاسايدى، سونىمەن قاتار جەتىمدىكتىڭ الدىن الۋ بويىنشا جوبالاردى بەلسەندى تۇردە جۇزەگە اسىرادى. SOS وتباسىن قولداۋ ورتالىقتارىنىڭ نەگىزىندە جۇزدەگەن بالالار اتا-انالارىنان ايىرىلماۋعا تىرىسادى، ال اسىراپ الۋعا ۇمىتكەرلەر وقۋدان وتەدى، بۇل قوردىڭ جوبالارىن قوعام ءۇشىن ەرەكشە ماڭىزدى ەتەدى.
«Halyk» قورى: تاعدىردى وزگەرتەتىن كۇش
تيمۋر جانە دينارا قۇلىباەۆتار نەگىزىن قالاعان «Halyk» قايىرىمدىلىق قورى 2016 جىلدان باستاپ 85 ميلليارد تەڭگەدەن استام قاراجاتقا 120-دان استام الەۋمەتتىك جوبانى جۇزەگە اسىردى. قور ءبىلىم بەرۋ، سپورت، الەۋمەتتىك ينفراقۇرىلىم سالاسىنداعى باستامالاردى، سونداي-اق الەۋمەتتىك تۇرعىدان وسال توپتاردى قولداۋدى بەلسەندى تۇردە قولداپ كەلەدى.
