ۇبت-عا دايىندايتىن وقۋ ورتالىعىنىڭ نەگىزىن قالاعان جۇلدىزاي مۇساەۆا ءبىلىم سالاسىنداعى كەمشىلىكتەردى ايتىپ، وقۋ جۇيەسىن دامىتۋ جايىنداعى ويلارىمەن بولىسەدى.
جاز ايى باستالسا بولدى، مەكتەپ ءبىتىرۋشى تۇلەكتەر جوعارعى وقۋ ورنىن تاڭدايدى. ەلىمىزدە قالاعان جوعارعى وقۋ ورنىندا تەگىن ءبىلىم الۋعا بولادى، الايدا ءبارى دە تۇلەكتەردىڭ قورقىنىشتى تۇسىنە اينالعان ۇبت-دان العان بالىڭا قاراي شەشىلەدى. وسى كۇنى ۇبت-عا دايىندايتىن كۋرستاردىڭ ىشىندە وزىعى اتانعان JUZ40 ءبىلىم بەرۋ ورتالىعىنىڭ باسشىسى جۇلدىزاي مۇساەۆا ءبىراز جاننىڭ جوو-دا تەگىن ءبىلىم الۋىنا سەبەپشى بولىپ وتىر.
- بالا كەزدەگى ارمانىڭىز – جازۋشى بولۋ. ال قازىر نەلىكتەن بالا ارمانىڭىزدى ورىنداماسقا؟ مىسالى بيزنەس تۋرالى كىتاپ شىعارىپ، بولماسا فيلولوگيانى بىتىرگەننەن كەيىن ادەبي شىعارما نەگە جازىپ كورمەسكە؟ ونداي دۇنيە ويدا بار ما؟
- بالا كەزدەن جازۋشى بولعىم كەلگەنى راس. قازىر دە ول ارمانىم جۇرەگىمنەن وشكەن جوق. مەنىڭ ويىمشا، كىتاپ جازۋ ءۇشىن وعان لايىقتى بولۋ كەرەك. قازىرگى جەتىستىگىم بىرەۋگە كۇشتى بولۋى مۇمكىن، بىراق ءوزىم ءۇشىن ءالى ايتارلىقتاي جەتىستىككە جەتپەدىم. العا قويعان ءبىرشاما ماقساتتارىم ورىندالعان سوڭ، كومپانياداعى جۇمىستارىم جۇيەلەنگەننەن كەيىن، بۇيىرسا، ۋاقىتىمدى كىتاپ جازۋعا ارناعىم كەلەدى. ەڭ ءبىرىنشى كىتابىم – قازىرگى كاسىبىم تۋرالى بولادى دەپ ويلايمىن. ونى 2 جىلدىڭ ىشىندە جازۋىم مۇمكىن. ءوزىمنىڭ ەڭبەك جولىم تۋرالى كىتاپ كەمىندە 5 جىلدا جازىلاتىن شىعار. ال ادەبي شىعارمالاردى، بۇيىرسا، زەينەتكە شىققاندا جازاتىن شىعارمىن.
- ءسىزدىڭ بيزنەسىڭىز ءبىلىم سالاسىمەن بايلانىستى، جالپى نە ءۇشىن بۇنداي شەشىم قابىلدادىڭىز؟
- 3 سىنىپتان باستاپ مۇعالىمدەرىم، ديرەكتور اعايىم شىعارما جازۋعا قابىلەتىمدى بايقادى. ادەبيەتتى جاقسى كورگەندىكتەن، جازۋشى، رەداكتور بولۋ، گازەت-جۋرنالدا جۇمىس ىستەۋ دەگەن ارمان-ماقساتىم بار ەدى. ال مۇنىڭ ءبارى ءبىلىم سالاسىنا قاتىستى بولعاندىقتان، سول سالادا جۇرەم دەپ شەشتىم. 11 سىنىپتا ۇبت ماعان اۋىر سوققى بولىپ، ويىمداعىداي تاپسىرمادىم. وزگە وقۋشىلار وزدەرىن مەن سياقتى سەزىنبەۋى ءۇشىن «اۋىلدىق بالالارعا كومەكتەسەم» دەگەن نيەتپەن كۋرس اشۋعا بەل بۋدىم. ءسويتىپ 4 كۋرستا وقۋ ورتالىعىن اشقىم كەلەدى دەگەن ناقتى ماقسات پايدا بولدى. باستاپقىدا ونلايننىڭ ماسشتابىنا قاتتى سەنە قويمادىم، بىراق كارانتين كەزى كوپ نارسەنى وزگەرتتى. كەيىن كۋرسىمنىڭ مارتەبەسى ارتقان سايىن، مەكتەپ، ۋنيۆەرسيتەت اشۋ دەگەن ماقساتتار پايدا بولدى. جالپى قازاقستاننىڭ ءبىلىم سالاسىندا ەكوسيستەما قۇرىپ، دامىتامىن دەگەن ماقسات پايدا بولدى. ويتكەنى ەلدى دامىتقىمىز كەلسە، ءبىرىنشى بىلىمنەن باستاۋىمىز كەرەك. ال ءبىلىمنىڭ قاسىندا تاربيە ءسوزسىز ءجۇرۋى قاجەت.
- كەي ماماندىقتارعا ءتۇسۋ ءۇشىن وقۋشىلار شىعارماشىلىق ەمتيحان تاپسىرادى. ال سىزدەر ونداي وقۋشىلاردى تەك قانا تاريحتان دايىندايسىزدار. نەلىكتەن كومپانيادا شىعارماشىلىق ەمتيحانعا دايىندالاتىن مۇمكىندىك جوق؟ الداعى ۋاقىتتا بۇل ماسەلەنى شەشۋ جوسپاردا بار ما؟
- بۇل ماسەلەنى قاراستىرىپ كوردىك. شىعارماشىلىق ەمتيحانعا دايىندىقتى تولىق قامتۋ ءۇشىن ءبىز وففلاين كۋرس اشۋىمىز كەرەك. دايىندىقتىڭ كەي بولىگىن ونلاين وتۋگە بولادى، ەندى ءبىر بولىگى وففلاين عانا جۇزەگە اسادى. ءبارى ورتاق ءبىر جۇيەگە كەلمەگەندىكتەن، ءازىر باستى جوسپارىمىزعا ەنگىزبەدىك. ويتكەنى شىعارماشىلىق تاپسىراتىن وقۋشىلاردىڭ كوبى اۋىلدىق ايماقتان بولعاندىقتان، ولار وففلاينعا قاتىسا المايدى. دەمەك وففلاين بولساق، از عانا وقۋشىنى قامتيمىز. ال بىزدە وقىپ جاتقان بارلىق وقۋشىنى بىردەي قامتۋ ءۇشىن ونلاين فورماتتا جاساۋىمىز كەرەك. بۇل ماسەلەگە ءالى دە ويلانامىز. بالكىم، ونلاين وقىتۋعا كەلەتىن دۇنيەلەردى الداعى ۋاقىتتا دايىندايتىن شىعارمىز.
- وسى سالادا جۇرگەنىڭىزگە بيىل 6 جىل. وسى 6 جىل ىشىندە قانداي كەدەرگىلەرمەن جولىقتىڭىز؟
- ءار جىلدىڭ ءوز قىزىعى مەن قيىندىعى قاتار بولدى. مىنا جىل قاتتىراق اۋىر بولدى دەي المايمىن. كومپانيا وسكەن سايىن پروبلەما دا وسە باستادى. قيىندىقسىز، پروبلەماسىز ەشقانداي ناتيجە بولمايدى.
توپ-3 قيىندىقتىڭ ءبىرىنشىسى – دۇرىس كوماندا جيناۋ. ولاردى ءبىر ميسسيا مەن ماقساتقا بىرىكتىرۋ ءۇشىن 1 جىل ۋاقىتىم كەتتى. كوماندانىڭ كوبى جاستاردان قۇرالعاندىقتان، كەيدە تۇسىنبەي قالىپ جاتتى. ەندى بىردە جۇمىستارى ساباق ۋاقىتىمەن قاتار كەلىپ، ۇلگەرمەي «ۆىگورانيەگە» دە ۇشىرادى. قازىر مۇنداي ماسەلەنىڭ ءبارى شەشىلىپ جاتىر.
ەكىنشى قيىندىق – پلاتفورما جاساۋ. IT پلاتفورماسى باستاپقىدا ءوزىمىز ويلاعانداي بولمادى. اقاۋلار شىعىپ، وقۋشىلاردان نارازىلىق تۋدى.
ءۇشىنشى قيىندىق – فينانسقا قاتىستى ازداعان ماسەلە. قارجىلاي جوسپار قۇرساق تا، جىل سوڭىندا ول ورىندالماي قالدى. ساتۋ مەنەدجەرلەرى زيانعا ۇشىراپ، كىشكەنە قاراجات جەتىسپەي قالدى. بۇل ماسەلەنى تانىس كىسىدەن قارىز الىپ شەشكەن ەدىك.
- جاز مەزگىلىندە ينستاگرام اككاۋنتتارىڭىزعا وزدەرىڭىزدىڭ وزگە كۋرستارعا وكپە-ناز رەتىندە ۆيدەو جاريالادىڭىزدار. ناقتى «مىنا كۋرس» دەپ ايتپاساڭىز دا، سول كەزدە باسقا كۋرستارعا قانداي رەنىشىڭىز بولدى جانە قانداي رەنىشىڭىز بار؟ سول تۋرالى تارقاتىپ وتسەڭىز.
- نەگىزى اسا قاتتى رەنىش بولعان جوق. ەشكىممەن جاۋلاسقىمىز كەلمەيدى. بارلىق كونكۋرەنتكە جاقسى كوزقاراستامىز. دەگەنمەن كەيبىرىنىڭ تىم ارتىق كەتىپ قالاتىن كەزدەرى بولادى. كونكۋرەنتتەر ءبىزدىڭ چاتتارعا قوسىلىپ، كليەنتتەردىڭ ءنومىرىن الىپ، ولارعا حابارلاسسا دا ۇندەمەيتىنبىز. بىراق حابارلاسىپ قانا قويماي، ءبىزدى كليەنتكە جامانداعان كەزدە بۇل ماسەلەنى شەشۋ كەرەگىن تۇسىندىك. كليەنتتەردى الا بەرسىن، كۋرستارىن ۇسىنا بەرسىن، الايدا ءبىزدىڭ كۋرسقا ءتىل تيگىزىپ، قاتە اقپاراتتار ايتىپ ساتۋى دۇرىس ەمەس دەپ ويلايمىن. سوندىقتان بۇل ماسەلەنى ۆيدەو فورماتىندا جاريالاپ، نۇكتەسىن قويايىق دەپ شەشكەنبىز. سول ۆيدەودان كەيىن مۇنداي جاعداي ورىن العان جوق.
- سىزدە تاعى اعىلشىن كۋرسى بار ەكەنىن ەستىدىم. ول دا اعىلشىن كۋرستارى بويىنشا سونداي جوعارى دارەجەدە مە، الدە «ءالى دە ىستەۋ كەرەك» دەيتىن كەم-كەتىك تۇستارى بار ما؟
- اعىلشىن كۋرسىمىزدى بولەك كومپانيا رەتىندە ارنايى فوكۋس قويىپ جۇمىس ىستەپ كەلە جاتقانىنا 1 جارىم جىلداي بولدى. ال نەگىزى نارىقتا 4 جىلدان بەرى كەلە جاتىر. العاشقى 3 جىل دۇرىس فوكۋس قويا الماي، اراسىندا ءۇزىلىس الىپ، ۇلگەرمەي ءجۇردىم. باستاپقىدا ءوزىمىزدىڭ وقۋشىلارعا قوسىمشا ءبىلىم بەرۋ ماقساتىندا عانا اشقان ەدىم. سوڭعى 1 جارىم جىلدا باسقا دا كليەنتتەردى وقىتىپ باستايىق دەگەن نيەتپەن بولەك كوماندا قۇرىپ، باسشىسىن تاعايىندادىق. باسىندا مەتوديكا، ماتەريالدارعا قاتىستى قاتەلىكتەرىمىز بولدى. قازىر قۇدايعا شۇكىر، جاقسى ناتيجەلەر شىعىپ جاتىر.
- «مينيسترلىكتىڭ شەشىمىمەن ۇبت-نى مۇلدەم الىپ تاستايدى» دەگەن قورقىنىش جوق پا؟ ەگەر سونداي جاعداي بولىپ قالعان كەزدە، كومپانياڭىزعا نە بولادى دەپ ويلايسىز؟
- ۇبت-نى مۇلدە الىپ تاستايدى دەپ قورىقپايمىن. مۇلدە الىپ تاستايدى دەپ تە ويلامايمىن. تەك فورماتى، قۇرىلىمى، مازمۇنى وزگەرەتىن شىعار. ۋنيۆەرسيتەتكە ءتۇسۋ ءۇشىن ءبارىبىر ءبىر تەست كەرەك. سول تەستكە دايىندايمىز دەپ ويلايمىن. بىراق ءبىز ۇبت-مەن عانا شەكتەلمەي، الداعى ۋاقىتتا مەكتەپ، ۋنيۆەرسيتەت تە اشقىمىز كەلەدى. قازىر جاڭا جوبالار جاساپ جاتىرمىز. مىسالى، بىزدە وقىپ كەتكەن ستۋدەنتتەردىڭ بىلىكتى مامان رەتىندە قالىپتاستۋىنا كومەكتەسۋ ءۇشىن ءبىر جوبا، ال مۇعالىمدەردىڭ بىلىكتىلىگىن ارتتىرۋ ماقساتىندا تاعى ءبىر جوبا اشىپ جاتىرمىز. سونىمەن قاتار ءبىزدى ءبىتىرىپ كەتكەن تۇلەكتەردىڭ جينالىپ، داميتىن قاۋىمداستىعىن قۇرىپ جاتىرمىز. ستۋدەنتتەرگە IT كۋرس جاساۋ دا جوسپارىمىزدا بار. جالپى ستۋدەنتتەردىڭ بىلىكتى مامان بولىپ قالىپتاسۋى ءۇشىن JUZ40 UNIVERSITY اياسىندا بىرنەشە جوبانى جۇزەگە اسىرعىمىز كەلەدى. بۇيىرسا، كەلەر جىلى مەكتەپ اشامىز.
الداعى ۋاقىتتا كتل، نيش-قا دايىندىق كۋرسىن باستاپ، شەتەلگە وقۋعا ءتۇسىرۋ بويىنشا دا جۇمىس ىستەيتىن شىعارمىز. ءبىلىم نارىعىنا بويلاي ەنىپ، ەكوسيستەما قۇرۋ ارقىلى قازاقستاننىڭ ءبىلىم سالاسىن دامىتقىمىز كەلەدى.
- ينستاگرام جەلىسىندەگى جەكە اككاۋنتىڭىزدا «جەكە مەكتەپ اشۋ» تۋرالى جوسپارىڭىزدىڭ بارىن بايقاتتىڭىز. وسى تۋرالى تارقاتىپ ايتا كەتسەڭىز قاشان اشىلادى، قالاي بولادى؟
- جەرىن، ورنىن تاۋىپ قويدىق. بۇيىرسا، قاراشا ايىندا ناقتى كەلىسىم جۇرەدى دەپ ويلايمىن. مۇمكىن كوكتەمنەن باستاپ مەكتەپتىڭ قۇرىلىسى باستالاتىن شىعار. كەلەر جىلعا ۇلگەرسەك، 10-11 سىنىپقا high school اشامىز دەپ وتىرمىز. ۇلگەرمەي جاتساق، ودان كەيىنگى جىلى بىردەن 7-11 سىنىپقا اشۋىمىز مۇمكىن. بۇيىرسا، مەكتەپتىڭ ءبىرىنشىسى – الماتىدا، ەكىنشىسى – استانادا، ءۇشىنشىسى اقتاۋ نە تارازدان اشىلاتىن شىعار.
- 10 جىلدان كەيىن ءوز كومپانياڭىزدى قالاي ەلەستەتەسىز؟
- 10 جىلدان كەيىن ۇلكەن حولدينگ رەتىندە ەلەستەتەم. ءبىلىم سالاسىندا ءار ءتۇرلى جوبالاردى بىرىكتىرىپ، ەكوسيستەما قۇرعان ەڭ الپاۋىت جوبالاردىڭ باستاۋشىسى رەتىندە كورەم.
- سۇحباتىڭىزعا راحمەت!
يسلام ادەن
