نازارباەۆ ۋنيۆەرسيتەتىندە 13 جىلعا جۋىق ساباق بەرگەن عالىم، فيلولوگ ايگەرىم الياسقار بۇگىندە Harvard Extension School-دا ءبىلىم الىپ جاتىر. «ادىرنا» تىلشىسىنە بەرگەن سۇقباتىندا وتانداسىمىز گارۆارد ۋنيۆەرسيتەتىنە جۇمىسقا شاقىرتۋ العانىن ايتتى.
ايگەرىم الياسقار – ءال-فارابي اتىنداعى قازۇۋ-ءدىڭ جانە ە.گۋميلەۆ اتىنداعى ەۇۋ تۇلەگى.
- قازىرگى تاڭدا Harvard Extension School-دا وقىپ جاتىرمىن. وندا بيزنەس باعىتىندا ءبىلىمىمدى جەتىلدىرۋدەمىن. ناقتى كاسىپ باستاماسام دا، قازىرگى الىپ جاتقان كۋرستارىم كوشباسشىلىق قابىلەتتەرىمدى دامىتۋعا، ستراتەگيالىق باسقارۋ مەن قارجىلىق تالداۋ داعدىلارىمدى جەتىلدىرۋگە ۇلكەن ۇلەس قوسىپ جاتىر. سەبەبى ءبىز الەم نارىعىنداعى الپاۋىتتار – Google, Facebook, Microsoft سىندى كوپتەگەن كومپانيالاردىڭ كەيستەرىن تالداپ، كوپ پايدالى ينسايتتار الىپ جاتىرمىز. جالپى، بۇل باعدارلاماعا ءتۇسۋ سونشالىقتى قيىن ەمەس. اسىقپاي ءوز تەمپىڭىزبەن 5 جىل ىشىندە 12 كۋرستى وتە جاقسى باعامەن اياقتاساڭىز، ماگيستر دارەجەسىن الا الاسىز. گارۆاردتىڭ ەڭ ءبىرىنشى بەرەتىن قۇندى دۇنيەسى – نەتۆوركينگ. الەمنىڭ مىقتىلارى ءبىر ارنادا توعىسىپ، وي ءبولىسىپ، دوستاساتىنى ۇنايدى. ماسەلەن، جازدا العان كۋرسىمدا ستۋدەنت رەتىندە گارۆاردتىڭ زاڭ فاكۋلتەتىنىڭ پروفەسسورى دا بولدى، گرۋپپالاس رەتىندە بىرگە جوبا جاسادىق، مەن ءۇشىن بۇل تاماشا نەتۆوركينگ بولدى. قازىردىڭ وزىندە 50-دەن اسا نوبەل سىيلىعىنىڭ يەگەرى گارۆاردتا ساباق بەرەدى، وسىنداي ەنەرگەتيكادا بولۋدىڭ قانداي باقىت ەكەنىن ايتىپ جەتكىزە المايمىن،— دەيدى ول.
قازاقستاندىق ستۋدەنتتەرگە اكادەميالىق جازىلىم، كاسىبي قازاق ءتىلى پاندەرىنەن بەرگەن وقىتۋشى جاقىن ارادا شەتەلدىك ءبىلىم الۋشىلارعا دا قازاق ءتىلىن ۇيرەتپەك. ايتۋىنشا، گارۆارد ۋنيۆەرسيتەتىندە ورتالىق ازيا تىلدەرىن وقىتۋ جانە زەرتتەۋ جوباسى قولعا الىنىپ جاتىر.
– Arts and Science فاكۋلتەتىنەن جۇمىسقا شاقىرتۋ الدىم. قازاق، وزبەك جانە قىرعىز تىلدەرىنىڭ ماماندارىنا ۆاكانسيا جاريالانعاندا نازارباەۆ ۋنيۆەرسيتەتىنەن العان مول تاجىريبەمنىڭ ارقاسىندا كونكۋرستىڭ بارلىق ساتىسىنان ءساتتى ءوتتىم. الداعى سەمەستردە تىلدەردى زەرتتەۋ باعىتىندا ءبىلىم الىپ جاتقان PhD ستۋدەنتتەرىنە ساباق بەرەتىن بولامىن،—دەپ ءتۇسىندىردى فيلولوگ.
ايگەرىم الياسقار قاجەت ءبىلىمدى جيناقتاعاننان كەيىن قازاقستانعا ورالاتىنىن جەتكىزدى.
- وقۋ مەن جۇمىسىمىزدى اياقتاعاننان كەيىن، ارينە، ەلگە قايتامىز. قازاقستاننىڭ دامۋىنا ۇلەس قوسۋ – ءبىزدىڭ ازاماتتىق پارىزىمىز. الداعى ۋاقىتتا مەملەكەتىمىزگە ءوز پايداسىن تيگىزەر ۇلكەن جوبالاردى ىسكە اسىرۋ ويىمىزدا بار. قازىر كۇشىمىز تاسىپ، جالىنداپ تۇرعان كەزىمىزدە الەمنىڭ مول تاجىريبەسىن، ينسايتتارىن الىپ، وتانىمىزعا بۇدان دا مىقتى مامان رەتىندە ورالعىمىز كەلەدى،— دەيدى ول.
فيلولوگ سۇقبات بارىسىندا قازاقستان مەن شەتەلدەگى ءبىلىم بەرۋ جۇيەسىنە دە توقتالدى.
«امەريكانىڭ ءبىلىم بەرۋ جۇيەسىنىڭ باستى ەرەكشەلىكتەرىن اتاپ وتۋگە بولادى. ەڭ الدىمەن، مۇندا ناقتى پراكتيكالىق داعدىلار مەن پروبلەمالاردى شەشۋگە باسا نازار اۋدارىلادى. وعان قوسا، يندۋستريادان مامانداردى وقىتۋشىلىققا تارتۋ ءىسى دە كەڭىنەن تارالعان. ولار ەڭبەك نارىعىنىڭ قازىرگى تالاپتارىن بىلەدى، سوندىقتان وقۋ باعدارلاماسىنا سوڭعى جاڭالىقتاردى ەنگىزە الادى. ال يندۋستريا جاڭا تالانتتاردى ىرىكتەپ، بولاشاق مامانداردى تابۋعا مۇمكىندىك الادى. وسىلايشا تەوريا مەن پراكتيكانىڭ ۇشتاسۋى ەكىجاقتى پايدا بەرەدى. ەكىنشىدەن، پروفەسسورلار مەن وقىتۋشىلاردىڭ ستۋدەنتتەرگە دەگەن قارىم-قاتىناسى قۇرمەت پەن تەڭدىككە نەگىزدەلگەن. Student-oriented دەگەن تاسىلگە سۇيەنىپ، ستۋدەنتتىڭ قاجەتتىلىكتەرى مەن مۇددەلەرى باستى ورىنعا قويىلعان. وقىتۋشى مەنتور رەتىندە ستۋدەنتتىڭ الەۋەتىن اشۋعا جۇمىس جاسايدى. كۋرس سوڭىندا ستۋدەنتتەر وقىتۋشىنىڭ جۇمىسىن جان-جاقتى باعالايدى، سول كەرى بايلانىستىڭ ناتيجەسىندە تەك تاڭداۋلى ۇستازدار عانا جۇمىسىن جالعاستىرا الادى.
قازىرگى تاڭدا قازاقستاندىق ءبىلىم بەرۋ جۇيەسىنە دە وڭ وزگەرىستەر ەنگىزىلىپ جاتىر. الداعى ۋاقىتتا ءبىلىم ارقىلى ەلىمىزدىڭ ەكونوميكالىق دامۋىنا اسەر ەتە الامىز دەپ سەنەمىن»،—دەپ پىكىر ءبىلدىردى وقىتۋشى.
ايگەرىم تانىم كوكجيەگىن كەڭەيتىپ، شەتەلدە وقىعىسى كەلەتىن جاستاردى باتىل بولۋعا شاقىردى. ايتۋىنشا، قازىرگى تاڭدا تەگىن ءبىلىم الۋعا بارلىق جاعداي جاسالعان.
- قازاق جاستارىنىڭ شەتەلدە وقۋعا ۇمتىلۋىن وتە كەرەمەت قۇبىلىس دەپ سانايمىن. ولار امەريكا مەن ەۋروپا ەلدەرىنەن العان جوعارى ءبىلىمى مەن تاجىريبەسى ارقىلى وتانىمىزدىڭ گۇلدەنۋىنە زور ۇلەس قوسىپ، جاڭا دەڭگەيگە شىعارا الادى. قازىرگى تاڭدا شەتەلدىك ۋنيۆەرسيتەتتەر ىشكى گرانتتاردى PhD باعدارلاماسىنا ءجيى بولەدى. ولار تەگىن وقىپ قانا قويماي، جۇمىس ىستەۋ مۇمكىندىگىنە دە يە بولادى. كەيبىر جاستار «بولاشاق» باعدارلاماسىنان باس تارتىپ، ىشكى گرانتقا اۋىسىپ جاتادى. شەتەلدە وقىعىسى كەلەتىن جاستار ەرازمۋس+, Fulbright, DAAD سىندى باعدارلاماردى زەرتتەپ كورۋى ءتيىس. ەڭ الدىمەن، مەن قورىقپاۋعا كەڭەس بەرەمىن. ادام تالاپتانسا عانا قالاعان ماقساتىنا جەتەدى. كوپ ادام قورقاقتاپ، تاۋەكەلگە باس تىكپەگەندىكتەن، ءبىر ورىندا قالىپ قويادى. بۇگىندە شەتەلدە تەگىن وقۋعا كومەكتەسىپ، باعىت-باعدار بەرەتىن كوپتەگەن كومپانيا جۇمىس ىستەيدى. قاجەت اقپارات اشىق دەرەككوزدەردە تولىپ تۇر. جاستار وسى مۇمكىندىكتى دۇرىس پايدالانعانىن قالايمىن،- دەپ تۇيىندەدى ول.
ديانا اسان
«ادىرنا» ۇلتتىق پورتالى
