پاتريوتتىق رۋح – قوعامنىڭ بىرلىگىن نىعايتىپ، ەلدىڭ دامۋىنا ۇلەس قوسۋعا ىنتالاندىراتىن ماڭىزدى فاكتور. سوندىقتان بۇل سەزىمدى دامىتۋدا ءبىلىم بەرۋ، مادەنيەت، جانە ۇلتتىق بىرلىك ماڭىزدى ءرول اتقارادى. ەل بىرلىگى، تاۋەلسىزدىگى جانە بولاشاعى ءۇشىن پاتريوتتىق سەزىمدەردى دامىتۋ – قوعامنىڭ تۇراقتىلىعى مەن تابىسىنىڭ باستى كەپىلى.
ەڭ الدىمەن، پاتريوتيزم تۋرالى تۇسىنىككە تولىعىراق انىقتاما بەرەيىك. پاتريوتيزم – بۇل ادامنىڭ ءوز وتانىنا دەگەن ماحابباتى، ونى قورعاۋعا، دامىتۋعا جانە قۇرمەتتەۋگە دەگەن شىنايى سەزىمى. پاتريوتيزم جەكە ادامنىڭ مەملەكەتپەن، قوعاممەن، تۋعان جەرىمەن جانە ۇلتتىق قۇندىلىقتارمەن تىعىز بايلانىسىن كورسەتەدى. بۇل تۇسىنىك تاريحي، مادەني جانە رۋحاني تۇرعىدا قالىپتاسقان جانە ول ازاماتتىڭ ءوزىنىڭ ەلىنە دەگەن بورىشىن، جاۋاپكەرشىلىگىن جانە ادالدىعىن بىلدىرەدى…
ال ەندەشە پاتريوتتىق سەزىمدى وياتۋعا ارنالعان ادىستەردى تىزبەكتەيتىن بولساق:
ءبىرىنشى ورىندا ءتۇبى تەرەڭ تاريحىمىزدى ءبىلۋ. تاريحتى زەرتتەپ ءبىلۋ ارقىلى ادامداردىڭ ءوز ەلىنىڭ وتكەنىنە دەگەن قۇرمەتى مەن ماقتانىشىن ارتتىرۋعا بولادى. تاريحي وقيعالار مەن جەڭىستەر تۋرالى اقپاراتتار، ۇلى تۇلعالار سونىڭ ىشىندە اباي قۇنانبايۇلى، ماعجان جۇماباەۆ، مۇحتار اۋەزوۆ، احمەت بايتۇرسىنۇلى، ءاليحان بوكەيحان تاعى باسقادا زيالى قاۋىمنىڭ شىعارمالارى پاتريوتتىق سەزىمدى ودان ارمەن كۇشەيتەدى.
سونداي-اق ۇلتتىق مەرەكەلەردى، مادەني فەستيۆالدەردى، ونەر كورمەلەرىن ۇيىمداستىرۋ ارقىلى حالىقتىڭ ءوز مادەنيەتىنە جانە داستۇرلەرىنە دەگەن سۇيىسپەنشىلىگىن وياتۋعا بولادى. مىسالى، ۇلتتىق اندەر، بيلەر، سالت-داستۇرلەردىڭ ساقتالۋى حالىقتىڭ بىرلىگى مەن ماقتانىشىن ارتتىرادى.
ۇلتتىق سيمۆولداردى قۇرمەتتەۋ. تۋدى، ەلتاڭبانى جانە ءانۇراندى ناسيحاتتاۋ: ۇلتتىق رامىزدەردى قاستەرلەۋ ءپاتريوتيزمنىڭ ماڭىزدى بولىگى. جاستاردى مەكتەپ قابىرعاسىنان باستاپ ۇلتتىق رامىزدەرگە دەگەن قۇرمەتكە ۇيرەتۋ ارقىلى ولاردىڭ مەملەكەتكە دەگەن سۇيىسپەنشىلىگى ارتا تۇسەدى. مەملەكەتتىك مەرەكەلەردى تويلاۋ. تاۋەلسىزدىك كۇنى، كونستيتۋتسيا كۇنى، مەملەكەتتىك رامىزدەر كۇنى، سونىمەن قاتار جاقىنداپ كەلىپ قالعان رەسپۋليكا كۇنى (25 قازان) سەكىلدى مەملەكەتتىك مەرەكەلەردى حالىق اراسىندا كەڭىنەن اتاپ ءوتۋ ۇلتتىق بىرلىكتى كۇشەيتەدى. جاستاردى پاتريوتتىققا تاربيەلەۋ. مەكتەپتەردە، ۋنيۆەرسيتەتتەردە پاتريوتتىق تاربيە بەرۋ ماڭىزدى. وقۋشىلارعا مەملەكەتتىڭ تاريحى، مادەنيەتى، گەوگرافياسى جانە جەتىستىكتەرى تۋرالى اقپارات بەرۋ ولاردىڭ ەلگە دەگەن سۇيىسپەنشىلىگىن ارتتىرادى. جاستاردى قوعامداعى ماسەلەلەردى شەشۋگە بەلسەندى قاتىسۋعا شاقىرۋ ارقىلى رۋحىن كوتەرەمىز.
سپورتتاعى جارقىن جەڭىستەر ارقىلى ۇلتتىق سپورتشىلاردى قولداۋ. سپورتشىلاردىڭ حالىقارالىق ارەنالارداعى جەڭىستەرى حالىقتى رۋحتاندىرادى جانە پاتريوتتىق سەزىمدى وياتادى. حالىقارالىق سپورتتىق جارىستاردا قازاقستاننىڭ سپورتشىلارىنىڭ جەڭىستەرى ءپاتريوتيزمنىڭ ايقىن كورىنىسى بولىپ تابىلادى. جاپپاي سپورتتى دامىتۋ: سپورتتىق ءىس-شارالارعا قاتىسۋ ارقىلى جاستاردى پاتريوتيزمگە تاربيەلەۋ مۇمكىندىگى بار.
مەملەكەتتىك قىزمەت جانە اسكەري مىندەت. اسكەر قاتارىنا شاقىرتۋ جانە ونى مارتەبەلى مىندەت رەتىندە قابىلداۋ جاستاردىڭ ەل الدىنداعى جاۋاپكەرشىلىگىن ارتتىرادى. بۇل ءپاتريوتيزمنىڭ كۇشتى كورىنىسى بولىپ تابىلادى.مەملەكەتتىك قىزمەتكە قۇشتارلىقتى تاربيەلەۋ: مەملەكەتتىك قىزمەتكە دەگەن قىزىعۋشىلىقتى ارتتىرۋ جانە حالىققا قىزمەت ەتۋگە ۇمتىلۋ ارقىلى پاتريوتتىق سەزىمدى كۇشەيتۋگە بولادى.
ۇلتتىق قۇندىلىقتاردى دارىپتەۋ ۇلتتىق ءتىل مەن ءداستۇردى ساقتاي وتىرا ءبىز ەلگە دەگەن ءوز قۇرمەتىمىزدى كورسەتەمىز. ءتىلدى ساقتاۋ ارقىلى ۇلتتىق بىرەگەيلىك پەن ءپاتريوتيزمدى قولداۋ جۇزەگە اسادى. ۇلتتىق قۇندىلىقتاردى ناسيحاتتاۋ: حالىقتىڭ رۋحاني جانە مورالدىق قۇندىلىقتارىن ناسيحاتتاپ، ۇرپاقتان-ۇرپاققا جەتكىزۋ ءپاتريوتيزمدى نىعايتۋدا ماڭىزدى.
قوعامدىق اقپارات قۇرالدارى ارقىلى ءپاتريوتيزمدى وياتۋ. تەلەديدار، راديو، ينتەرنەت ارقىلى پاتريوتتىق باعدارلامالار، دەرەكتى فيلمدەر مەن تاريحي درامالاردى كورسەتۋ حالىق اراسىندا پاتريوتتىق سەزىمدەردى وياتادى. الەۋمەتتىك مەديا پلاتفورمالاردا ەلدىڭ جەتىستىكتەرى مەن پاتريوتتىق قۇندىلىقتاردى ناسيحاتتاۋ، ۇلتقا دەگەن سۇيىسپەنشىلىكتى ارتتىرۋدا ءتيىمدى قۇرال بولۋى مۇمكىن.
پاتريوتتىق سەزىمدى دامىتۋ — بۇل ۇزاق مەرزىمدى جۇمىس، بىراق دۇرىس جۇمىس شارالار ارقىلى ءار ازاماتتىڭ ءوز ەلىنە دەگەن ماقتانىشىن وياتىپ، ەلگە قىزمەت ەتۋگە ىنتالاندىرۋعا بولادى.
مۇراتقىزى ايگۇل
