الماتىداعى تۇركسىب اۋدانىنىڭ ەكونوميكاسى تۇراقتى ءارى سەرپىندى دامىپ وتىر. بۇل تۋرالى قالا اكىمى ەربولات دوساەۆ اۋدان تۇرعىندارىمەن كەزدەسۋ بارىسىندا ايتتى. قالا باسشىسىنىڭ ايتۋىنشا، نەگىزگى كاپيتالعا سالىنعان ينۆەستيتسيا 9 ايدىڭ ىشىندە 21%-عا، ونىڭ ىشىندە جەكە ينۆەستيتسيا 27%-عا وسكەن. بارلىعى 150 ملرد تەڭگە ينۆەستيتسيا تارتىلدى.
«اۋداندا جۇمىس ىستەپ تۇرعان بيزنەس سۋبەكتىلەرىنىڭ سانى 7,8%-عا ءوستى. بۇگىنگى كۇنى اۋداندا 29 مىڭنان استام بيزنەس سۋبەكتىسى بەلسەندى جۇمىس ىستەپ جاتىر، بۇل سالىق ءتۇسىمىن 164 ملرد تەڭگەگە دەيىن ۇلعايتۋعا، سونداي-اق 3,5 مىڭ جاڭا تۇراقتى جۇمىس ورنىن اشۋعا مۇمكىندىك بەردى»، - دەدى ەربولات دوساەۆ.
2024 جىلى اۋداننىڭ بيۋدجەتى وتكەن جىلمەن سالىستىرعاندا 4 ەسە ۇلعايدى. ماسەلەن، 2023 جىلدىڭ باسىندا بيۋدجەت 5,4 ملرد تەڭگە بولسا، 2024 جىلدىڭ باسىندا ول 21,3 ملرد تەڭگەگە جەتتى.
2024 جىلدىڭ ماۋسىمىندا اۋدان بيۋدجەتى تاعى 9%-عا ءوسىپ، 23,5 ملرد تەڭگەگە جەتتى، بۇل ينجەنەرلىك جانە جول ينفراقۇرىلىمىن جاڭعىرتۋعا، سونداي-اق قوعامدىق كەڭىستىكتەردى كورىكتەندىرۋگە باعىتتالعان جوبالاردى جۇزەگە اسىرۋعا مۇمكىندىك بەردى، دەپ اتاپ ءوتتى الماتى اكىمى.
ايتا كەتەيىك، الماتى قالاسىنىڭ ەكونوميكاسىندا جالپى جوعارى ينۆەستيتسيالىق بەلسەندىلىك بايقالادى.
بيىلعى 9 ايدىڭ قورىتىندىسى بويىنشا نەگىزگى كاپيتالعا 1 133 ملرد تەڭگە ينۆەستيتسيا تارتىلىپ، ءوسىم 8,1% بولدى. 2024 جىلدىڭ باسىنان بەرى جەرگىلىكتى بيۋدجەتكە ءتۇسىم 27,2%-عا ءوستى، بۇل «الماتىنى دامىتۋ باعدارلاماسى 2025 جىلعا دەيىن جانە 2030 جىلعا دەيىنگى ورتا مەرزىمدى پەرسپەكتيۆاسى» اياسىندا باسىم جوبالاردى قارجىلاندىرۋدى ۇلعايتۋعا مۇمكىندىك بەردى. 2024 جىلدىڭ باسىنان باستاپ الماتىنىڭ بيۋدجەتى 204,5 ملرد تەڭگەگە كوبەيىپ، 1 828,5 ملرد تەڭگەگە جەتتى.
