الماتىداعى ءال-فارابي داڭعىلىندا وتكەن تۇندە جاپپاي جول-كولىك وقيعاسى ورىن الدى، دەپ حابارلايدى «ادىرنا» ۇلتتىق پورتالى.
جەرگىلىكتى پوليتسيا قىزمەتىنىڭ حابارلاۋىنشا، بۇل جول-كولىك وقيعاسى بۇگىن تۇنگى 00:50-دە الماتىنىڭ مەدەۋ اۋدانىندا بولعان.
Toyota Camry اۆتوكولىگىنىڭ جۇرگىزۋشىسى ءال-فارابي داڭعىلىمەن باتىس باعىتتا كەلە جاتىپ، مەڭدىقۇلوۆ كوشەسى قيىلىسىندا كولىگىن باسقارا الماي، سول باعىتتا كەلە جاتقان Lexus اۆتوكولىگىنە سوقتىعىسقان. ودان كەيىن Toyota اۆتوكولىگى ينەرتسيانىڭ اسەرىنەن قارسى باعىتتاعى قوزعالىس جولاعىنا شىعىپ، شىعىس باعىتتا كەلە جاتقان BMW اۆتوكولىگىمەن سوقتىعىسقان، — دەلىنگەن الماتى پوليتسياسىنىڭ ءباسپاسوز قىزمەتى حابارلاماسىندا.
وسى جول-كولىك وقيعاسىنىڭ ناتيجەسىندە بەس ادام، سونىڭ ىشىندە Toyota Camry اۆتوكولىگىنىڭ جۇرگىزۋشىسى مەديتسينالىق كومەككە جۇگىندى. وقيعانىڭ ءمان-جايىن انىقتاۋ ءۇشىن مەدەۋ اۋدانى پوليتسيا باسقارماسىنىڭ قىزمەتكەرلەرى تەرگەۋ جۇمىستارىن باستادى.
