قاراعاندى وبلىسى مەن ساران قالاسىنىڭ اكىمدىكتەرى، قاراعاندى وبلىسىنىڭ توتەنشە جاعدايلار دەپارتامەنتى دالا ءورتىن ءسوندىرۋ كەزىندە قازا تاپقان 24-ءوسب ازاماتتىق قورعاۋ سەرجانتى حالي حايراتتىڭ وتباسىنا كوڭىل ايتادى.
1991 جىلى تۋعان حالي حايرات 2014 جىلدىڭ 12 مامىرىنان باستاپ ازاماتتىق قورعاۋ ورگاندارىندا قىزمەت ەتكەن. ول ساران قالاسىندا تۇرعان، جوعارى كاسىبيلىگى مەن جاۋاپكەرشىلىگىمەن ەرەكشەلەنگەن.
قازا تاپقان ءورت ءسوندىرۋشىنىڭ ۇيىنە وبلىس اكىمى ەرماعانبەت بولەكپاەۆ، ونىڭ ورىنباسارى الىبەك الدەنەي جانە ساران قالاسىنىڭ اكىمى ەركىن باۋلىقوۆ باردى.
قاراعاندى وبلىسىنىڭ اكىمى مارقۇمنىڭ ەل الدىنداعى ەڭبەگى ۇمىتىلمايتىنىن جەتكىزدى.
«دالا ءورتى كەزىندە قازا تاپقان باتىرىمىز حالي حايراتتىڭ وتباسىنا كوڭىل ايتتىم. ونىڭ دالا ورتىمەن كۇرەسۋ كەزىندەگى ەرلىگى ناعىز باتىلدىق پەن ادالدىقتىڭ ۇلگىسى بولىپ تابىلادى. حالي حايرات ءوز ءومىرىن حالقىنا قىزمەت ەتۋگە جانە تۋعان جەرىن قورعاۋعا ارنادى. وسىناۋ قيىن ساتتە ءبىز ءحاليدىڭ تۋىستارىنىڭ قايعىلارىنا ورتاقتاسىپ، قولداۋىمىزدى كورسەتەمىز. ونىڭ جارقىن بەينەسى مەن ەل الدىنداعى ەڭبەگى ۇمىتىلمايدى»،—دەدى ول.
مارقۇمنىڭ وتباسىنا جەرلەۋ ءىس-شارالارىن وتكىزۋگە بارلىق قاجەتتى كومەك كورسەتىلەدى. ۇيدە فەلدشەرلىك جانە پسيحولوگيالىق قىزمەتتەر كەزەكشىلىك ەتەدى. وتباسىن قولداۋ بويىنشا بارلىق قاجەتتى شارالار قاراعاندى وبلىسى اكىمدىگىنىڭ تۇراقتى باقىلاۋىندا.
وقيعانىڭ ءمان-جايى انىقتالۋدا. سوتقا دەيىنگى تەرگەۋ باستالدى.
ەستەرىڭىزگە سالا كەتەيىك، 6 قازاندا قارقارالى اۋدانىندا دالا ءورتى تۇتاندى. ونى جويۋ ءۇشىن تجم بارلىق قىزمەتتەرى، ونىڭ ىشىندە تجد 111 قىزمەتكەرى، قۇقىق قورعاۋ ورگاندارى، 27 ءتۇرلى تەحنيكا جۇمىلدىرىلدى، ءورت ءسوندىرۋدىڭ جەدەل شتابى اشىلدى. وبلىس اكىمى وقيعا ورنىندا جەدەل شتابپەن كەڭەس وتكىزدى.
