Qaraǵandy oblysy men Saran qalasynyń ákimdikteri, Qaraǵandy oblysynyń Tótenshe jaǵdaılar departamenti dala órtin sóndirý kezinde qaza tapqan 24-ÓSB azamattyq qorǵaý serjanty Halı Haırattyń otbasyna kóńil aıtady.
1991 jyly týǵan Halı Haırat 2014 jyldyń 12 mamyrynan bastap azamattyq qorǵaý organdarynda qyzmet etken. Ol Saran qalasynda turǵan, joǵary kásibıligi men jaýapkershiligimen erekshelengen.
Qaza tapqan órt sóndirýshiniń úıine oblys ákimi Ermaǵanbet Bólekpaev, onyń orynbasary Álibek Áldeneı jáne Saran qalasynyń ákimi Erkin Baýlyqov bardy.
Qaraǵandy oblysynyń ákimi marqumnyń el aldyndaǵy eńbegi umytylmaıtynyn jetkizdi.
«Dala órti kezinde qaza tapqan batyrymyz Halı Haırattyń otbasyna kóńil aıttym. Onyń dala órtimen kúresý kezindegi erligi naǵyz batyldyq pen adaldyqtyń úlgisi bolyp tabylady. Halı Haırat óz ómirin halqyna qyzmet etýge jáne týǵan jerin qorǵaýǵa arnady. Osynaý qıyn sátte biz Halıdiń týystarynyń qaıǵylaryna ortaqtasyp, qoldaýymyzdy kórsetemiz. Onyń jarqyn beınesi men el aldyndaǵy eńbegi umytylmaıdy»,—dedi ol.
Marqumnyń otbasyna jerleý is-sharalaryn ótkizýge barlyq qajetti kómek kórsetiledi. Úıde feldsherlik jáne psıhologııalyq qyzmetter kezekshilik etedi. Otbasyn qoldaý boıynsha barlyq qajetti sharalar Qaraǵandy oblysy ákimdiginiń turaqty baqylaýynda.
Oqıǵanyń mán-jaıy anyqtalýda. Sotqa deıingi tergeý bastaldy.
Esterińizge sala keteıik, 6 qazanda Qarqaraly aýdanynda dala órti tutandy. Ony joıý úshin TJM barlyq qyzmetteri, onyń ishinde TJD 111 qyzmetkeri, quqyq qorǵaý organdary, 27 túrli tehnıka jumyldyryldy, órt sóndirýdiń jedel shtaby ashyldy. Oblys ákimi oqıǵa ornynda jedel shtabpen keńes ótkizdi.
