بۇگىن وبلىس اكىمى نۇرلىبەك نالىباەۆتىڭ قاتىسۋىمەن «ۇستازىم-ۇلاعاتىم!» اتتى مۇعالىمدەر كۇنىنە ارنالعان سالتاناتتى شارا ءوتتى. جيىنعا سالا باسشىلارى، وبلىس پەداگوگتەرى، زيالى قاۋىم وكىلدەرى مەن ارداگەرلەر قاتىستى.
ايماق باسشىسى ۇستازداردى مەرەكەمەن قۇتتىقتاپ، ءبىلىم سالاسىنداعى جەتىستىكتەرگە توقتالدى.
"مەملەكەت باسشىسى قاسىم-جومارت كەمەلۇلى حالىققا جولداۋىندا: «ۇستازدار – ۇلتتىڭ زياتكەرلىك قۋاتى. ولار ءبىلىمدى ۇرپاق تاربيەلەۋ ارقىلى ەلىمىزدىڭ وركەندەۋىنە جول اشادى»، - دەپ اتاپ ءوتتى.
شاكىرتتەرىنە زاماناۋي ءبىلىم مەن ونەگەلى تاربيە بەرىپ، ۇلتتىق قۇندىلىقتار مەن ادامگەرشىلىك ىزگى قاسيەتتەردى بويىنا دارىتاتىن ۇستازعا دەگەن حالقىمىزدىڭ قۇرمەتى قاشان دا ەرەكشە.
ءبىلىم، عىلىم، مادەنيەت جانە ونەر سالاسىنىڭ دامۋى – وركەنيەتتىڭ ولشەمى، قوعام دامۋىنىڭ باستى كورسەتكىشى.
بيىل ءبىلىم سالاسىنىڭ جالپى بيۋدجەتى 262,1 ملرد تەڭگەگە جەتىپ، وتكەن جىلمەن سالىستىرعاندا 8,8 % ارتتى.
جىل باسىنان بەرى 10 ءبىلىم بەرۋ نىسانى پايدالانۋعا بەرىلدى. مەملەكەت باسشىسىنىڭ باستاماسىمەن قولعا الىنعان «جايلى مەكتەپ» ۇلتتىق جوباسى اياسىندا ايماعىمىزدا 12 300 ورىنعا ارنالعان 21 مەكتەپ قۇرىلىسى جوسپارلانىپ، بيىل 10-ى سالىنۋدا. ۇستازدار مەرەكەسى قارساڭىندا رەسپۋبليكامىزداعى العاشقى 900 ورىندىق جايلى مەكتەپ قىزىلوردا قالاسىنىڭ سول جاعالاۋىنان پايدالانۋعا بەرىلگەنىنە وزدەرىڭىز كۋا بولدىڭىزدار.
ادىلەتتى، جاڭا، جاسامپاز قازاقستاننىڭ بولاشاعى سىزدەردىڭ قولدارىڭىزدا، قادىرلى ۇستازدار!
شاكىرتتەرىڭىزبەن بىرگە شىعارماشىلىق جەتىستىكتەرگە جەتە بەرىڭىزدەر!" ، - دەدى ن.نالىباەۆ.
سالتاناتتى شارادا ءبىلىم سالاسىندا قاجىرلى ەڭبەك ەتىپ، جەتىستىكتەرگە جەتكەن بىرقاتار ۇستازدار وقۋ-اعارتۋ مينيسترلىگىنىڭ ى. التىنسارين، «ءبىلىم بەرۋ ءىسىنىڭ قۇرمەتتى قىزمەتكەرى» توسبەلگىلەرىمەن، قۇرمەت گراموتاسىمەن، مينيسترلىكتىڭ جانە قىزىلوردا وبلىسى اكىمىنىڭ «العىسىمەن» ماراپاتتالدى.
جاقىندا بالالاردىڭ بوس ۋاقىتىن ءتيىمدى ۇيىمداستىرۋ، جان-جاقتى دامىتۋ ماقساتىندا «قازگەرمۇناي» كومپانياسىنىڭ دەمەۋشىلىگىمەن سالىنعان 350 ورىندىق زاماناۋي وقۋشىلار سارايى ەل يگىلىگىنە تابىستالدى. وندا سوڭعى ۇلگىدەگى ماتەريالدىق-تەحنيكالىق بازامەن جابدىقتالعان كابينەتتەر قاراستىرىلعان.
سپورت،قولونەر جانە قولدانبالى ونەر، مۋزىكا-حورەوگرافيا، تەحنيكالىق- شىعارماشىلىق،الەۋمەتتىك عىلىمدار نەگىزىندە 50-گە جۋىق ۇيىرمە ءوز جۇمىسىن باستادى.
وسكەلەڭ ۇرپاقتىڭ سالاۋاتتى ءومىر سالتىن ۇستانۋىنا، بوس ۋاقىتىن ءتيىمدى وتكىزۋىنە ارنالعان زاماناۋي ۇلگىدەگى ۇستەل تەننيسى ورتالىعى قولدانىسقا بەرىلدى. جاڭا سپورت كەشەنىندە 16 ۇستەل تەننيسى، 350 ورىندىق كورەرمەندەر جانە جاتتىعۋ زالى بار.
جىل سوڭىنا دەيىن «جايلى مەكتەپ» ۇلتتىق جوباسى اياسىندا 5 مەكتەپ، «ءبىلىم بەرۋ ينفراقۇرىلىمىن قولداۋ» قورى ارقىلى فيزيكا-ماتەماتيكا مەكتەپ-ينتەرناتى، جەكە ينۆەستورلار ەسەبىنەن ارال اۋدانى، اقشاتاۋ اۋىلىندا 60 ورىندىق، توقاباي اۋىلىندا 100 ورىندىق مەكتەپتەر، 2 مەكتەپ جانىنان قوسىمشا عيمارات، جاڭاقورعان اۋدانىندا 1 قوسىمشا ءبىلىم بەرۋ ۇيىمى پايدالانۋعا بەرىلمەك.
سول جاعالاۋدا «ساۋتس ويل» كومپانياسىنىڭ دەمەۋشىلىگىمەن مۋزىكالىق كوللەدج عيماراتىنىڭ قۇرىلىسى قارقىندى جۇرۋدە.
بالالار مەن جاسوسپىرىمدەردىڭ شىعارماشىلىعىن شىڭداۋ ماقساتىندا بيىل وبلىس ورتالىعىنان يننوۆاتسيالىق- شىعارماشىلىق اكادەمياسىنىڭ قۇرىلىسى باستالدى.
الەمدىك قاۋىمداستىقتان ويىپ ورىن الامىز دەسەك، جاستارىمىز ءبىلىمدى، وزىق ويلى، ينتەللەكتۋالدى بولۋى كەرەك.
مەملەكەت باسشىسىنىڭ باستى تالابى – زاماناۋي ءبىلىم بەرۋ وشاقتارىن كوبەيتۋ، مۇعالىم مەن وقۋشىعا بارىنشا جاعداي جاساۋ.
بۇل رەتتە، جاڭا قۇرىلىس نىساندارىنان بولەك، توزىعى جەتكەن مەكتەپتەردى دە جاڭارتۋ جۇمىستارى قارقىندى جۇرۋدە.
بيىلدىڭ وزىندە 3,1 ملرد تەڭگەگە 8 مەكتەپ كۇردەلى جوندەۋدەن ءوتىپ، «ءبىلىم بەرۋ ينفراقۇرىلىمىن قولداۋ» قورى ارقىلى شيەلى، جاڭاقورعان اۋداندارىنداعى 2 مەكتەپكە 375 ورىندىق قوسىمشا قۇرىلىس، جەرگىلىكتى بيۋدجەت ەسەبىنەن قىزىلوردا قالاسىنداعى №4 مەكتەپكە 300 ورىندىق وقۋ كورپۋسى مەن 100 ورىندىق اسحانا، قارماقشى اۋدانىندا №284 مەكتەپ-ينتەرناتىنا سپورت زالى، جاڭاقورعان اۋدانىندا №255 مەكتەپكە سپورت زالى مەن 20 ورىندىق اسحانا سالىندى.
بالالاردىڭ قاۋىپسىزدىگى دە باستى نازاردا. وبلىس اۋماعىنداعى مەكتەپتەردىڭ بارلىعى 100% بەينەباقىلاۋ كامەراسىمەن قامتىلعان.
