ۇلتتىق قاۋىپسىزدىك كوميتەتى قازاقستاننىڭ ءۇش ءىرى قالاسىندا جانە التى وڭىردە ۇيىمداسقان قىلمىستىق توپقا قارسى اۋقىمدى وپەراتسيا وتكىزدى. ونىڭ ناتيجەسىندە 50 ادام ۇستالدى، دەپ حابارلايدى «ادىرنا» ءتىلشىسى.
«18 قىركۇيەكتە ۇقك، ءىىم جانە بپ ۆەدومستۆوارالىق جەدەل-تەرگەۋ توبى استانا، الماتى جانە شىمكەنت قالالارىندا، سونداي-اق اقتوبە، اتىراۋ، الماتى، جەتىسۋ، باتىس قازاقستان جانە پاۆلودار وبلىستارىندا تۇراقتى ۇيىمداسقان قىلمىستىق توپتىڭ مۇشەلەرىن ۇستاۋعا ارنالعان وپەراتسيا جۇرگىزدى. بارلىعى 50 ادام ۇستالىپ، ىشكى ىستەر ورگاندارىنا جەتكىزىلدى. تەرگەۋ امالدارى جۇرگىزىلۋدە»،–دەلىنگەن حابارلامادا.
ولار تاۋارلار مەن اۆتوكولىكتەردى اسا ءىرى كولەمدە ۇرلاۋ ارناسىن ۇيىمداستىردى، سونداي-اق ۇيىمداسقان قىلمىستى قارجىلاندىردى دەپ كۇدىكتەلىپ وتىر. سونداي-اق 20-دان استام ادامنىڭ سەنىمىنە كىرىپ، 2 ميلليارد تەڭگەدەن اسا مۇلىكتى توناعان.
توپتىڭ ناقتى يەرارحياسى مەن قاتىسۋشىلارىنىڭ رولدەرىنىڭ ءبولىنۋى بولعان، ولار قىلمىس پەن دەسترۋكتيۆتى ءدىني ورتانىڭ وكىلدەرىنەن، سونىڭ ىشىندە تۇزەۋ مەكەمەسىندە جازاسىن وتەۋشىلەردەن قۇرالعان.
«تىنتۋلەر بارىسىندا بانك كارتالارى، ءىرى اقشا قاراجاتى، ەكسترەميستىك ادەبيەتتەر، اقشا اۋدارىمدارى جازىلعان جازبالار جانە تەرگەۋ ءۇشىن قىزىعۋشىلىق تۋدىراتىن وزگە دە زاتتار تابىلدى»،—دەپ تولىقتىردى ۇلتتىق قاۋىپسىزدىك كوميتەتى.
