استانا قالاسى قازاقستان حالقى اسسامبلەياسىنىڭ ۇيىمداستىرۋىمەن ەلوردادا «ۇلتتىق قۇندىلىقتار – ۇلت قازىناسى» اتتى فەستيۆال ءوتتى، دەپ حابارلادى ەلوردا اكىمدىگىنىڭ رەسمي سايتى.
قازاق حالقىنىڭ مادەنيەتىن ناسيحاتتاپ، ساندىك-قولدانبالى ونەر تۇرلەرىمەن تانىسۋعا مۇمكىندىك بەرەتىن، دوستىق پەن تاتۋلىقتى ارقاۋ ەتكەن ءىس-شاراعا قالالىق ەتنومادەني بىرلەستىكتەردىڭ وكىلدەرى قاتىستى. ولاردىڭ قاتارىندا قازاقتان باستاپ، ورىس، ۋكراين، تاتار، قاراقالپاق، وزبەك، ازەربايجان جانە وزگە دە ەتنوس وكىلدەرى بولدى.
«بۇگىنگى ءىس-شارانىڭ ماقساتى – قازاق حالقىنىڭ مادەنيەتىن، ونىڭ ىشىندە ءداستۇرى مەن ونەرىن پاش ەتۋ، ۇلتتار اراسىنداعى مادەني بىرەگەيلىكتى ايقىنداي وتىرىپ، ەتنومادەني مۇرانى ساقتاۋ مەن تاراتۋ. وزگە ۇلت وكىلدەرى قازاق مادەنيەتىمەن جاقىن تانىسۋ ءۇشىن ەڭ الدىمەن ويۋ-ورنەك تۇرلەرىن ءبىلۋى كەرەك دەپ ويلايمىن. سوندىقتان فەستيۆالگە قاتىسۋشىلار تاقيا باسۋدى ۇيرەنەدى جانە ۇلتتىق مادەنيەتتى ايقىندايتىن سۋرەت كورمەسىمەن تانىسادى»،-دەدى «جايحۋن» قاراقالپاق ەتنومادەني بىرلەستىگىنىڭ ءتورايىمى تازابيكە ساليەۆا.
فەستيۆال اياسىندا كيىز باسۋدان شەبەرلىك ساباعى ۇيىمداستىرىلدى. قاتىسۋشىلار كيىز بۇيىمدارىن جاساۋدىڭ تەحنيكاسىمەن تانىسىپ قانا قويماي، ونى بىلىكتى شەبەرلەردىڭ جەتەكشىلىگىمەن وزدەرى دە جاساپ كوردى. سونىمەن قاتار ءىس-شارا بارىسىندا قازاق حالىق اسپاپتارى ءانسامبلى ونەر كورسەتىپ، مەرەكەلىك كوڭىل-كۇي سىيلادى.
