Astana qalasy Qazaqstan halqy assambleıasynyń uıymdastyrýymen elordada «Ulttyq qundylyqtar – ult qazynasy» atty festıval ótti, dep habarlady elorda ákimdiginiń resmı saıty.
Qazaq halqynyń mádenıetin nasıhattap, sándik-qoldanbaly óner túrlerimen tanysýǵa múmkindik beretin, dostyq pen tatýlyqty arqaý etken is-sharaǵa qalalyq etnomádenı birlestikterdiń ókilderi qatysty. Olardyń qatarynda qazaqtan bastap, orys, ýkraın, tatar, qaraqalpaq, ózbek, ázerbaıjan jáne ózge de etnos ókilderi boldy.
«Búgingi is-sharanyń maqsaty – qazaq halqynyń mádenıetin, onyń ishinde dástúri men ónerin pash etý, ulttar arasyndaǵy mádenı biregeılikti aıqyndaı otyryp, etnomádenı murany saqtaý men taratý. Ózge ult ókilderi qazaq mádenıetimen jaqyn tanysý úshin eń aldymen oıý-órnek túrlerin bilýi kerek dep oılaımyn. Sondyqtan festıvalge qatysýshylar taqııa basýdy úırenedi jáne ulttyq mádenıetti aıqyndaıtyn sýret kórmesimen tanysady»,-dedi «Jaıhýn» qaraqalpaq etnomádenı birlestiginiń tóraıymy Tazabıke Sálıeva.
Festıval aıasynda kıiz basýdan sheberlik sabaǵy uıymdastyryldy. Qatysýshylar kıiz buıymdaryn jasaýdyń tehnıkasymen tanysyp qana qoımaı, ony bilikti sheberlerdiń jetekshiligimen ózderi de jasap kórdi. Sonymen qatar is-shara barysynda qazaq halyq aspaptary ansambli óner kórsetip, merekelik kóńil-kúı syılady.
