قازاقستانعا مەملەكەتتىك ساپارمەن كەلگەن قىتاي حالىق رەسپۋبليكاسىنىڭ توراعاسى سي ءتسزينپيندى «اقوردا» رەزيدەنتسياسىندا سالتاناتتى قارسى الۋ ءراسىمى ءوتتى.
مەملەكەت باسشىسى قاسىم-جومارت توقاەۆ قحر توراعاسى سي ءتسزينپيننىڭ كورتەجىن ءوزى كۇتىپ الدى. مارتەبەلى مەيماننىڭ قۇرمەتىنە قازاقستان رەسپۋبليكاسى اۋە قورعانىسى كۇشتەرىنىڭ ۇشاقتارى پرەزيدەنت سارايىنىڭ الدىنان قىتاي تۋىمەن تۇستەس قىزىل، سارى جولاق ءىز قالدىرىپ، ۇشىپ ءوتتى.
بۇدان كەيىن قاسىم-جومارت توقاەۆ پەن سي تسزينپين ءبىر-بىرىنە رەسمي دەلەگاتسيا مۇشەلەرىن تانىستىردى. قۇرمەت قاراۋىلىنىڭ باستىعى راپورت بەرىپ، ەكى ەلدىڭ ءانۇراندارى ورىندالدى.
پرەزيدەنت، ەڭ الدىمەن، شاقىرۋىن قابىل الىپ، ەلىمىزگە مەملەكەتتىك ساپارمەن كەلگەنى ءۇشىن سي تسزينپينگە ريزاشىلىعىن ءبىلدىردى.
– ءسىزدىڭ ساپارىڭىزدىڭ ءمان-ماعىناسى وتە زور، ەرەكشە دەپ ايتۋعا بولادى. قىتاي حالىق رەسپۋبليكاسى – تاتۋ كورشى، ماڭىزدى ستراتەگيالىق سەرىكتەس ءارى باستى وداقتاس مەملەكەتتىڭ ءبىرى. بەرىك دوستىققا جانە ءوزارا قولداۋعا نەگىزدەلگەن قازاق-قىتاي قارىم-قاتىناسى بۇرىن-سوڭدى بولماعان قارقىنمەن دامىپ كەلە جاتىر. مەن مۇنى ۇلكەن قۋانىشپەن اتاپ وتەمىن. ءسىز قازاقستان مەن قىتايدىڭ ماڭگىلىك جان-جاقتى ستراتەگيالىق ارىپتەستىگىن نىعايتۋعا زور ۇلەس قوستىڭىز. مۇنى جوعارى باعالايمىز. ەكى ەلدىڭ ىنتىماقتاستىعىن حالىقتارىمىزدىڭ يگىلىگى ءۇشىن جاڭا دەڭگەيگە كوتەرۋ قاجەت دەگەن باستاماڭىزدى تولىق قولدايمىن. بۇگىنگى باسقوسۋىمىزدى وسىنىڭ ايقىن دالەلى دەۋگە بولادى، – دەدى قازاقستان پرەزيدەنتى.
قاسىم-جومارت توقاەۆ بارلىق باعىت بويىنشا قارقىندى دامىپ كەلە جاتقان قازاق-قىتاي ىنتىماقتاستىعىنىڭ جاي-كۇيىن جوعارى باعالادى.
– قىتاي – ءبىز ءۇشىن تاتۋ كورشى عانا ەمەس، جاقىن دوسىمىز ءارى ۋاقىت تەزىنەن وتكەن سەنىمدى سەرىكتەسىمىز. ءبىز ورتاق تاريحتىڭ، تاتۋ كورشىلىك قاتىناستاردىڭ جانە ءوزارا قولداۋدىڭ مىزعىماس قۇندىلىقتارىنا سۇيەنە وتىرىپ، شىن مانىندە ۇلگى ەتەرلىك مەملەكەتارالىق قاتىناستى جولعا قويدىق. جىلدان-جىلعا ءوزارا بايلانىستارىمىزدىڭ مازمۇنى بايىپ كەلەدى، – دەدى مەملەكەت باسشىسى.
ءوز كەزەگىندە سي تسزينپين قازاق جەرىندە قۇرمەت كورسەتكەنى ءۇشىن قازاقستان پرەزيدەنتىنە العىس ايتتى.
– قۇرمەتتى پرەزيدەنت مىرزا، قىمباتتى دوسىم! مەنىڭ ساپارىما ءمان بەرىپ وتىرعانىڭىزعا ريزاشىلىعىمدى بىلدىرەمىن. ءسىز مەملەكەت باسشىسى قىزمەتىنە كىرىسكەن ساتتەن باستاپ رەفورمالار مەن ەلدىڭ دامۋىن بەلسەندى ءارى ماقساتتى تۇردە ىلگەرىلەتىپ كەلەسىز. ىشكى جانە سىرتقى ساياساتتا ءتيىمدى شارالاردىڭ تۇتاس توپتاماسىن قابىلدادىڭىز. سونىڭ ناتيجەسىندە ەلىڭىزدىڭ جالپى قۋاتى مەن حالىقارالىق بەدەلى ايتارلىقتاي ارتتى. تاتۋ كورشى رەتىندە ءبىز بۇل جەتىستىكتەرگە شىن جۇرەكتەن قۋانامىز. بىلتىر ەكەۋىمىز سيان مەن بەيجىڭدە ەكى رەت كەزدەسىپ، جاڭا جوسپارلاردى بەلگىلەدىك. سونداي-اق «التىن وتىز جىلدىقتا» قىتاي-قازاق قاتىناستارىن قارقىندى دامىتۋدىڭ نەگىزگى باعىتتارىن ايقىندادىق. قىتاي قازاقستانمەن اراداعى قارىم-قاتىناستى ءاردايىم ستراتەگيالىق تۇرعىدان جانە ۇزاقمەرزىمدى پەرسپەكتيۆا دەڭگەيىندە قاراستىراتىنىن راستاعىم كەلەدى. سونداي-اق كورشىلەس ەلدەرگە قاتىستى ۇستاناتىن ءوزىنىڭ سىرتقى ساياساتىندا قازاقستانعا باسىمدىق بەرەدى جانە ورتالىق ازياداعى ماڭىزدى سەرىكتەس ەل سانايدى. قىتاي-قازاق بايلانىستارىن قامتاماسىز ەتۋدە ءبىزدىڭ ەرىك-جىگەرىمىز بەن ۇستانىمىمىز وزگەرمەيدى جانە كونيۋنكتۋرالىق ىقپالعا ۇشىرامايدى. قىتاي ارقاشان قازاقستانعا سەنىمدى تىرەك بولاتىنىن مالىمدەيمىن، – دەدى قحر توراعاسى.
بۇدان كەيىن كەلىسسوز رەسمي دەلەگاتسيا مۇشەلەرىنىڭ قاتىسۋىمەن كەڭەيتىلگەن قۇرامدا جالعاستى.
