بۇگىن 10 زەرەندىلىك وتباسى جاڭا تۇرعىن ءۇيدىڭ يەگەرى اتاندى. جاڭا قونىستانۋشىلار اراسىندا – كوپبالالى وتباسىلار مەن جەتىم بالالار.
پاتەر كىلتتەرىن اقمولا وبلىسىنىڭ اكىمى مارات احمەتجانوۆ تاپسىردى.
«ءوز ءۇيىڭدى تابۋ - ءار وتباسى ءۇشىن، ءار ادام ءۇشىن ۇلكەن مەرەكە. ءبىزدىڭ پرەزيدەنت ءبىرىنشى كەزەكتە ەلىمىزدىڭ ازاماتتارىنىڭ ءومىر ءسۇرۋ ساپاسىن ارتتىرۋعا باعىتتالعان الەۋمەتتىك جوبالاردى ىسكە اسىرۋعا ەرەكشە نازار اۋدارادى. ءاربىر ادام ءۇشىن باستى ماسەلەلەردىڭ ءبىرى – تۇرعىن ۇيمەن قامتاماسىز ەتۋ ماسەلەسى. وسى ماقساتتا مەملەكەتتىك باعدارلامالار قابىلدانادى، جاڭا جۇمىس ورىندارى قۇرىلادى، جەرلەستەرىمىز پاتەر الاتىن ۇيلەر سالىنادى. ءبىز ءۇشىن ەڭ باستىسى – اقمولالىقتاردىڭ ءال-اۋقاتى. ءار ءۇي وتباسىلىق جايلىلىقتىڭ جىلۋىنا تولسىن، ال ءار كۇن سىزگە تەك جاعىمدى ەموتسيالار اكەلسىن»، - دەپ اتاپ ءوتتى مارات احمەتجانوۆ.
كوپ بالالى انا گۇلزادا اقپاەۆا جۇبايىمەن بىرگە بەس بالا تاربيەلەپ وتىر. ولار ءوز پاتەرلەرىن كوپتەن بەرى قالاعان، بىراق ساتىپ الۋعا مۇمكىندىگى بولمادى. 2012 جىلدان بەرى كەزەكتە تۇر.
«اقىرى ءبىزدىڭ ارمانىمىز ورىندالدى. اسىرەسە بالالار قاتتى قۋاندى. مۇندا مەكتەپ، دۇكەن، جۇمىس ءبارى جاقىن ورانالاسقان. بالالار باقىتتى، ءبىز وتە ريزامىز»، - دەپ ءبولىستى گ.اقپاەۆا.
ايتا كەتەيىك، زەرەندى اۋدانىندا 19 مىڭ شارشى مەتردەن استام تۇرعىن ءۇي پايدالانۋعا بەرىلدى، بۇل كەزەكتى قىسقارتۋعا مۇمكىندىك بەردى. بۇدان باسقا، حالىقتىڭ الەۋمەتتىك وسال توپتارى ءۇشىن كەيىننەن ساتىپ الۋ ارقىلى، 60 جەكە تۇرعىن ءۇي سالۋ جوسپارلانۋدا.
