ءباسپاسوز ءماسليحاتىندا قازاق تىلىندە سۇراق قويعان جۋرناليسكە شۇيلىككەن فۋتبولدان قازاقستان قۇراماسىنىڭ باپكەرى ستانيسلاۆ چەرچەسوۆتى جاقتاۋشىلار تابىلدى، دەپ حابارلايدى “ادىرنا” ۇلتتىق پورتالى.
الىشەر ءىلياسۇلى ەسىمدى جەلى قولدانۋشىسى باس باپكەردىڭ سىنعا العان كوپشىلىككە ۇندەۋ جولدادى:
“بۇگىن الەۋمەتتىك جەلىدە تالقىعا ءتۇسىپ جاتقان ءبىر ماسەلەگە كوزىمە ءتۇستى. ول فۋتبولدان قازاقستان قۇراماسىنىڭ باس باپكەرى بولىپ تاعايىندالعان رەسەيلىك باپكەر ستانيسلاۆ چەرچەسوۆ جايىندا. وسەتين ۇلتىنىڭ وكىلىنە قازاقستانستاندىق جۋرناليستەر قايتا-قايتا قازاقشا سۇراق قويىپ، ساۋالدىڭ استىنا العان سىڭايلى. باستاپقىدا قازاقشا قويعان سۇراقتى قفف پرەزيدەنتى ادىلەت بارمەنقۇلوۆ مىرزانىڭ ورىسشاعا اۋدارىپ بەرگەنى دە توقتام بولماپتى.
قالاي دەسەك تە، ەلگە قىزمەت ەتۋگە كەلگەن ماماننان جۇمىسىنا قاتىستى ناتيجە تالاپ ەتپەي، تىلدىك ماسەلە توڭىرەگىندە داۋ قوزدىرۋدى قۇپتامايمىن.
بىرىنشىدەن، وسەتيندىك ازاماتتىڭ قازاق ءتىلىن بىلمەيتىنى ايدان انىق. بۇل ۋاقىتتىڭ ەنشىسىندەگى دۇنيە. قازىر فەدەراتسيا ستانيسلاۆ چەرچەسوۆتىڭ قازاقشا ۇيرەنىپ جاتقانى تۋرالى اقپارات جاريالادى. سوندىقتان، جاڭا كەلگەن باپكەردى جاعادان الۋ مادەنيەتتىلىككە جاتپايدى.
ەكىنشىدەن، ءتىل، ءدىن سەكىلدى نازىك تاقىرىپتاردا مەملەكەتتىك تۇرعىدان ويلاپ، ەلدىڭ ابىرويىن دا ەستەن شىعارمايىق. ەگەر شەت ەلدەن كەلگەن ءار مامانعا جۇمىس ىستەۋگە مۇمكىندىك بەرمەي، قازاقشا سويلەۋىن عانا تالاپ ەتسەك، شەتەلدىكتەر ءبىزدىڭ ەل تۋرالى نە ويلايدى؟
ۇشىنشىدەن، جۋرناليستەر قاشاندا كاسىبيلىك تانىتۋعا ءتيىس. ءتىلشىنىڭ مىندەتى وبەكتيۆتىلىك، كوتەرىلگەن ماسەلەنى كوپكە جەتكىزۋ، شىنايى اقپارات تاراتۋ. ال جۋرناليست تاقىرىپتان اۋىتقىپ، ءمىن ىزدەپ، باسقا جاققا بۇرا تارتسا، قالاي بولعانى؟ الدىنا كەلگەن ماماننان قازاق فۋتبولىن قالاي دامىتاتىنىن، قانداي جاڭالىق الىپ كەلەتىنىن سۇراساق، ماسەلە باسقا ەدى. سوندىقتان بۇل جەردە ۇلتشىلدىققا سالۋدىڭ، ارازدىق قوزدىرۋدىڭ قاجەتى جوق.
ەڭ باستىسى ەلدىك مۇددەگە جۇمىلىپ، كاسىبيلىكتىڭ، بيىك مادەنيەتتىڭ شەكاراسىنان اتتاماي، بايىپتىلىق تانىتقان ابزال دەپ ويلايمىن” دەلىنگەن ونىڭ جازباسىندا.
ەستەرىڭىزگە سالا كەتەيىك، بۇعان دەيىن چەرچەسوۆتىڭ قازاقشا سۇراق قويعان جۋرناليسكە نارازىلىق تانىتقانىن جازعان بولاتىنبىز.
