Baspasóz máslıhatynda qazaq tilinde suraq qoıǵan jýrnalıske shúılikken fýtboldan Qazaqstan quramasynyń bapkeri Stanıslav Cherchesovty jaqtaýshylar tabyldy, dep habarlaıdy “Adyrna” ulttyq portaly.
Álisher Ilııasuly esimdi jeli qoldanýshysy bas bapkerdiń synǵa alǵan kópshilikke úndeý joldady:
“Búgin áleýmettik jelide talqyǵa túsip jatqan bir máselege kózime tústi. Ol fýtboldan Qazaqstan quramasynyń bas bapkeri bolyp taǵaıyndalǵan reseılik bapker Stanıslav Cherchesov jaıynda. Osetın ultynyń ókiline qazaqstanstandyq jýrnalıster qaıta-qaıta qazaqsha suraq qoıyp, saýaldyń astyna alǵan syńaıly. Bastapqyda qazaqsha qoıǵan suraqty QFF prezıdenti Ádilet Barmenqulov myrzanyń orysshaǵa aýdaryp bergeni de toqtam bolmapty.
Qalaı desek te, elge qyzmet etýge kelgen mamannan jumysyna qatysty nátıje talap etpeı, tildik másele tóńireginde daý qozdyrýdy quptamaımyn.
Birinshiden, osetındik azamattyń qazaq tilin bilmeıtini aıdan anyq. Bul ýaqyttyń enshisindegi dúnıe. Qazir federaııa Stanıslav Cherchesovtiń qazaqsha úırenip jatqany týraly aqparat jarııalady. Sondyqtan, jańa kelgen bapkerdi jaǵadan alý mádenıettilikke jatpaıdy.
Ekinshiden, til, din sekildi názik taqyryptarda memlekettik turǵydan oılap, eldiń abyroıyn da esten shyǵarmaıyq. Eger shet elden kelgen ár mamanǵa jumys isteýge múmkindik bermeı, qazaqsha sóıleýin ǵana talap etsek, sheteldikter bizdiń el týraly ne oılaıdy?
Úshinshiden, jýrnalıster qashanda kásibılik tanytýǵa tıis. Tilshiniń mindeti obektıvtilik, kóterilgen máseleni kópke jetkizý, shynaıy aqparat taratý. Al jýrnalıst taqyryptan aýytqyp, min izdep, basqa jaqqa bura tartsa, qalaı bolǵany? Aldyna kelgen mamannan qazaq fýtbolyn qalaı damytatynyn, qandaı jańalyq alyp keletinin surasaq, másele basqa edi. Sondyqtan bul jerde ultshyldyqqa salýdyń, arazdyq qozdyrýdyń qajeti joq.
Eń bastysy eldik múddege jumylyp, kásibıliktiń, bıik mádenıettiń shekarasynan attamaı, baıyptylyq tanytqan abzal dep oılaımyn” delingen onyń jazbasynda.
Esterińizge sala keteıik, buǵan deıin Cherchesovtyń qazaqsha suraq qoıǵan jýrnalıske narazylyq tanytqanyn jazǵan bolatynbyz.
