Aqmola oblysy Qosshy qalasyndaǵy Rahymjan Qoshqarbaev atyndaǵy №1 mekteptiń túlegi 11 jyl boıy úzdik oqyp, «Altyn belgi» ıegeri atandy. Talapker «Adyrna» tilshisine bergen suqbatynda mundaı jetistikke qajyrly eńbek pen úzdiksiz izdenistiń arqasynda jetkenin aıtty.
Aıym Erjanova — bıylǵy UBT-dan 140 ball jınaǵan ekinshi oqýshy. Ol bári birden bolmaǵanyn aıtady.
BIIK MEJEGE JETÝ MAQSATY
Aıym testi tapsyrǵan bir úmit pen bir kúdiktiń bolǵanyn jasyra almady.
- Bul meniń ekinshi múmkindigim boldy. Alǵashqy testti 18 maýsymda tapsyryp, 136 upaı jınadym. Sol ýaqyt aralyǵynda daıyndalyp, barlyǵyn qaıtalap shyqtym. 28 maýsym kúni UBT-ǵa qoryqpaı kirdim. Shynymdy aıtsam, testti 1 saǵatta aıaqtaǵandyqtan, ózime senimdi boldym. Alaıda 1-2 suraqtan qate ketse she degen úreı boldy. Ony barlyq UBT tapsyrýshy túsinedi dep oılaımyn. Sońynda “aıaqtaý” degen batyrmany basyp, 140 degen balldy kórgende qýanyshymda shek bolmady. Aldyma maqsat etip qoıyp, oǵan barymdy salyp, osyndaı bıik mejege jetý árqashan oıymda boldy. Maqsatyma jetkenim úshin ózimdi keremet baqytty sezindim, - deıdi Aıym.
ERTE DAIYNDYQ
Jas túlek Ulttyq biryńǵaı testileýge 10 synyptan bastap daıyndalǵan.
- Jalpy tańdaý pánderim - dúnıejúzi tarıhy men aǵylshyn tili. «Eki shet tili» mamandyǵyn tańdap otyrmyn. Ázirge qaı ýnıversıtette oqıtynymdy naqty aıta almaımyn. Alaıda óz elimde, ıaǵnı Qazaqstanda oqýymdy jalǵastyramyn.Mamandyǵyma túsý úshin qıyn pánderdiń biri dúnıejúzi tarıhyn oqyp, barlyq aqparatty este saqtaý kerektigin túsiný meni daıyndyqty erterek bastaýǵa jeteledi. 10 synyptyń basynan ózim burynnan qatysyp júrgen mekteptegi is-sharalardan bas tartyp, tek UBT-ǵa fokýs qoıdym. UBT bekitken oqýlyqtardyń ár sóılemine nazar aýdaryp, túsinip oqý arqylydúnıejúzi tarıhynan 50/50 men Qazaqstan tarıhynan 20/20 upaıǵa qol jetkizdim, - deıdi ol.
USTAZDARǴA ALǴYS
Daryndy oqýshy daıyndyqqa óte kóp ýaqytyn arnaǵanyn atap ótti.
- Uıyqtaıtyn ýaqyttan basqa barlyq kezde testileýge daıyndaldym desem bolady. Bir pánnen jalyqsam, kelesisine ótip otyrdym. Osy oraıda dúnıejúzi tarıhy páninen offlaın sabaqtardan bólek, oqýshylary úshin qyzyqty vıdeolar túsirip bizdi 0-den bastap oqytqan Álisher Aldońǵarovqa sheksiz rahmet aıtqym keledi. Sol beınesabaqtardy jatsam da, tursam da, jolda kele jatsam da tyńdaıtynmyn. Bul maǵan óte kóp septigin tıgizdi. Sonymen qatar Qazaqstan tarıhy páninen ártúrli oıyndar oınatyp, sabaqty barynsha qyzyqty ótkizgen bilimdi ustaz Turan Saǵadatovqa da kóp rahmet! - dep alǵysyn jetkizdi ol.
KEREK KEŃES
Aıym Erjanova UBT-ny endi tapsyratyn talapkerlerge óz aqyl-keńesin aıtty.
- UBT-ǵa daıyndalý barysynda júıeli jospar qurýǵa keńes beremin. Eń aldymen, ishteı jaqsy nıet bolyp, úzdiksiz daıyndalý arqyly ǵana joǵary nátıjege qol jetkizýge bolady der edim. Árıne, arasynda demalýdy da umytpaý kerek. Ýaqtyly uıyqtap, kútingen jón. Ata-anama maǵan kórsetken qoldaýy men jasaǵan jaǵdaıy úshin alǵysymdy bildiremin. Taǵy bir maǵan kómektesken zat - dostarymmen kezdesip, birge taqyryptardy taldap, suraqtar qoıý. Keremet orta keremet bolashaqqa jeteleıdi. Bir-birimizge motıvaııa berip, laıfhaktarymyzben bólisip, barlyǵy qıyn, kúrdeli dep oılaıtyn daıyndyqty qyzyqty etip ótkizdik, -dep sózin qorytyndylady jas túlek.
Aıta keteıik, UBT tapsyrýǵa daıyndalǵan bilim berý ortalyǵy Aıym Erjanovaǵa bes mıllıon teńge, jańa iPhone jáne Dýbaıǵa saıahat syılady.
Buǵan deıin Almaty oblysynyń túlegi Jannur Eńsebektiń testileýden 140 ball jınaǵanyn jazǵan edik.
Dıana Asan
«Adyrna» ulttyq portaly
