قر حالىق ءارتيسى، قر مەملەكەتتىك سىيلىعىنىڭ لاۋرەاتى، «قۇرمەت» جانە «وتان» وردەندەرىنىڭ يەگەرى، كومپوزيتور ءارى ءانشى ەسكەندىر حاسانعاليەۆتىڭ ءومىرى مەن شىعارماشىلىعىنا بايلانىستى 100-دەن استام ەكسپونات مەملەكەتتىك ساقتاۋعا قابىلداندى.
«ەسكەندىر وتەگەنۇلىنىڭ شىعارماشىلىعى مەن ەڭبەگى حالىققا تيەسىلى. ەندى قازاقستاندىق ەسترادا اڭىزىنىڭ قولجازبالارى، ناگرادالارى، فوتوالبومدارى، سىيلىقتارى، كىتاپتارى، وردەندەرى مەن مەدالدارى مەملەكەتتىك ارحيۆتە ساقتالادى، وسكەلەڭ ۇرپاق قاجەت بولعان جاعدايدا وسىندا كەلىپ، تانىسا الادى. وتباسىمىزدىڭ اتىنان بارشاڭىزعا العىس بىلدىرەمىن»، - دەدى قر حالىق ءارتيسى ەسكەندىر حاسانعاليەۆتىڭ جۇبايى داريكو حاسانعاليەۆا.
ءىس-شاراعا زيالى قاۋىم وكىلدەرى، ەسكەندىر وتەگەنۇلىنىڭ تۋىستارى مەن جاقىندارى، دوستارى مەن سەرىكتەرى قاتىستى.
«ارحيۆ – بۇل حالىقتىڭ رۋحاني بايلىعى مەن مادەني مۇراسىن ساقتايتىن، بولاشاق ۇرپاققا ميراس ەتەتىن ماڭىزدى قۇرىلىم. بۇگىن الماتى قالاسىنىڭ ءارحيۆى ەسكەندىر حاسانعاليەۆتىڭ جەكە قورىنان الىنعان باعالى ماتەريالدارمەن تولىقتىرىلدى. تۋعان جەرگە جانە ءوز حالقىنا دەگەن سۇيىسپەنشىلىگىن ونەرىمەن جەتكىزگەن كومپوزيتوردىڭ شىعارمالارىن ساقتاۋ جانە ناسيحاتتاۋ – بارشامىزعا ورتاق مىندەت»، - دەدى الماتى قالاسى مادەنيەت باسقارماسىنىڭ باسشىسى عاني مايلىباەۆ.
