ءساۋىردىڭ 30-ىندا الماتىدا «دەرەكتى فوتو: تاريحى جانە دامۋ كوكجيەگى» اتتى مونوگرافيا تانىستىرىلدى. سوعان وراي ۇلتتىق كىتاپحانادا ارنايى تۇساۋكەسەر ءراسىمى ءوتتى.
«فوتوونەر» قوعامدىق بىرلەستىگى مەن ءال-فارابي اتىنداعى قازۇۋ جۋرناليستيكا فاكۋلتەتىنىڭ باسپاگەرلىك-رەداكتورلىق جانە ديزاينەرلىك ونەر كافەدراسى ۇيىمداستىرعان شارادا بۇل ەڭبەكتىڭ ءمان-ماڭىزى جايىندا ايتىلدى.
عىلىمي ەڭبەكتىڭ اۆتورلارى اسىلحان ءابدىرايىمۇلى، سەرىك مۇقىشۇلى جانە داۋرەن ماقسۇتحانۇلى دەرەكتى فوتو سالاسىنداعى اعىمدار مەن العاشقى قادامداردان باستاپ، ونىڭ بۇگىنگى بەتالىسى جايىندا توقتالعان.
- دەرەكتى فوتو فوتوگرافيانى الەۋمەتتىك تىلگە اينالدىردى. وسى ارقىلى فوتوگرافيا شىندىقتى اشۋشى جانە سىنعا الۋشى كورسەتكىشتىك مانگە يە بولدى. بارىنەن ماڭىزدىسى – دەرەكتى فوتو الەۋمەتتىك شىندىقتى بەلسەندى تۇردە جەتكىزەتىن قۇرالعا اينالدى، - دەيدى كىتاپ اۆتورىنىڭ ءبىرى سەرىك مۇقىشۇلى.
مونوگرافيالىق ەڭبەكتە اۆتورلار كوركەم فوتودان الىستاۋ ءجۇرىپ، ءمان-مازمۇنى بار «اششى» فوتوعا، ياعني دەرەكتى فوتوعا كەلۋگە شاقىرادى. كىتاپتا دەرەكتى فوتونىڭ ماڭىزى مەن تاريحى ءار كەزەڭدەگى اۆتورلار مەن ولاردىڭ تۋىندىلارى ارقىلى كورسەتىلەدى. ەڭبەكتىڭ قورىتىندى بولىمىندە دەرەكتى فوتونىڭ ەلىمىزدەگى بەتالىسى جانە ونىڭ ساپالى دامۋىنا جاسالعان العاشقى جوبالاردىڭ ناتيجەلەرى ۇسىنىلعان.
كلاسسيكالىق اق-قارا تۇستەگى فوتولارمەن بەزەندىرىلگەن بۇل كىتاپ: ««ءتاتتى فوتو» مەن «اششى فوتو» تەرميندەرىن عىلىمي اينالىسقا ەنگىزۋ جولدارى»، «الەمدەگى دەرەكتى فوتو جاعدايىن تالداۋ» جانە «قازاقستانداعى دەرەكتى فوتونىڭ دامۋ كوكجيەگى» اتتى نەگىزگى ءۇش تاراۋدان، سونىمەن قاتار اۆتورلىق تۇجىرىم مەن بيبليوگرافيالىق تىزىمدەردەن قۇرالعان.
كىتاپتا ورتالىق مەملەكەتتىك كينو-فوتوقۇجاتتار مەن دىبىس جازبالارى ءارحيۆىن قورىنان الىنعان سۋرەتتەرى پايدالانىلعان.
فوتوگرافيا سالاسى بويىنشا قازاق تىلىندە العاش رەت جارىق كورىپ وتىرعان مونوگرافيا دەرەكتى فوتونىڭ جانر رەتىندە دامۋىنا كومەكشى قۇرال بولا الادى.
«دەرەكتى فوتو: تاريحى جانە دامۋ كوكجيەگى» كىتابىنىڭ تۇساۋكەسەرىندە «National Geographic Qazaqstan» جۋرنالىنىڭ قولداۋىمەن قازاقستاندا العاش رەت ۇيىمداستىرىلعان «دەرەكتى فوتو» بىلىكتىلىكتى ارتتىرۋ كۋرسىنىڭ ناتيجەسى كورمە تۇرىندە ۇسىنىلىپ، ۇزدىكتەرى ارنايى سەرتيفيكاتتارمەن ماراپاتتالدى.
كىتاپ اۆتورلارى: اسىلحان ءابدىرايىمۇلى، سەرىك مۇقىشۇلى جانە داۋرەن ماقسۇتحانۇلى كىتاپتىڭ جارىق كورۋىنە قولداۋ بىلدىرگەن «قازاقستان اۆتورلار قوعامىنا» جانە وسى ەڭبەكتى باسپى شىعارعان «دارىن» باسپاسىنا العىسىن ءبىلدىردى.
«جاقسى فوتوشىعارما قاشان دا ادامدار جۇرەگىنە ۇيالايدى، بۇل – وزگەرمەيتىن اقيقات. ويتكەنى ونەر ادامنىڭ جۇرەگىنە، رۋحىنا اسەر ەتەدى. شىندىق قاشان دا ءتاتتى بولىپ كەلمەيدى»، - دەلىنگەن كىتاپتا.
