Sáýirdiń 30-ynda Almatyda «Derekti foto: tarıhy jáne damý kókjıegi» atty monografııa tanystyryldy. Soǵan oraı Ulttyq kitaphanada arnaıy tusaýkeser rásimi ótti.
«Fotoóner» qoǵamdyq birlestigi men ál-Farabı atyndaǵy QazUÝ jýrnalıstıka fakýltetiniń baspagerlik-redaktorlyq jáne dızaınerlik óner kafedrasy uıymdastyrǵan sharada bul eńbektiń mán-mańyzy jaıynda aıtyldy.
Ǵylymı eńbektiń avtorlary Asylhan Ábdiraıymuly, Serik Muqyshuly jáne Dáýren Maqsuthanuly derekti foto salasyndaǵy aǵymdar men alǵashqy qadamdardan bastap, onyń búgingi betalysy jaıynda toqtalǵan.
- Derekti foto fotografııany áleýmettik tilge aınaldyrdy. Osy arqyly fotografııa shyndyqty ashýshy jáne synǵa alýshy kórsetkishtik mánge ıe boldy. Bárinen mańyzdysy – derekti foto áleýmettik shyndyqty belsendi túrde jetkizetin quralǵa aınaldy, - deıdi kitap avtorynyń biri Serik Muqyshuly.
Monografııalyq eńbekte avtorlar kórkem fotodan alystaý júrip, mán-mazmuny bar «ay» fotoǵa, ıaǵnı derekti fotoǵa kelýge shaqyrady. Kitapta derekti fotonyń mańyzy men tarıhy ár kezeńdegi avtorlar men olardyń týyndylary arqyly kórsetiledi. Eńbektiń qorytyndy bóliminde derekti fotonyń elimizdegi betalysy jáne onyń sapaly damýyna jasalǵan alǵashqy jobalardyń nátıjeleri usynylǵan.
Klassıkalyq aq-qara tústegi fotolarmen bezendirilgen bul kitap: ««Tátti foto» men «Ay foto» termınderin ǵylymı aınalysqa engizý joldary», «Álemdegi derekti foto jaǵdaıyn taldaý» jáne «Qazaqstandaǵy derekti fotonyń damý kókjıegi» atty negizgi úsh taraýdan, sonymen qatar avtorlyq tujyrym men bıblıografııalyq tizimderden quralǵan.
Kitapta Ortalyq memlekettik kıno-fotoqujattar men dybys jazbalary arhıvin qorynan alynǵan sýretteri paıdalanylǵan.
Fotografııa salasy boıynsha qazaq tilinde alǵash ret jaryq kórip otyrǵan monografııa derekti fotonyń janr retinde damýyna kómekshi qural bola alady.
«Derekti foto: tarıhy jáne damý kókjıegi» kitabynyń tusaýkeserinde «National Geographic Qazaqstan» jýrnalynyń qoldaýymen Qazaqstanda alǵash ret uıymdastyrylǵan «Derekti foto» biliktilikti arttyrý kýrsynyń nátıjesi kórme túrinde usynylyp, úzdikteri arnaıy sertıfıkattarmen marapattaldy.
Kitap avtorlary: Asylhan Ábdiraıymuly, Serik Muqyshuly jáne Dáýren Maqsuthanuly kitaptyń jaryq kórýine qoldaý bildirgen «Qazaqstan avtorlar qoǵamyna» jáne osy eńbekti baspy shyǵarǵan «Daryn» baspasyna alǵysyn bildirdi.
«Jaqsy fotoshyǵarma qashan da adamdar júregine uıalaıdy, bul – ózgermeıtin aqıqat. Óıtkeni óner adamnyń júregine, rýhyna áser etedi. Shyndyq qashan da tátti bolyp kelmeıdi», - delingen kitapta.
